Xəbər verdiyimiz kimi “Mingəçevir”in 7 futbolçusu danışılmış oyunlarla bağlı saxlanılıb və sorğu-suala çəkiləndən sonra sərbəst buraxılıb.

Xatırladaq ki, söhbət Mövlan Kərimov, Xəyal Muradov, Xəyal Xudaverdiyev, Tural Məmmədzadə, Muxtar Nəzərli, Fuad Əhmədov və Elnur Mirzəyevdən gedir. Bəli, bu “sportinfo.az” saytının yayınladığı siyahıdı. “Football-plus.az”ın araşdırmaları nəticəsində isə başqa məlumatlar əldə edilib.

Belə ki, saxlanılan futbolçuların siyahısı genişlənib. Dəqiq desək, şübhəlilər sırasına Elmin Bayramov da əlavə edilib. Yəni “Mingəçevir”in mövsümün əvvəlində müqaviləsinin müddətini daha bir il uzatdığı yarımmüdafiəçinin də danışılmış oyunlarda iştirakı istisna olunmur.

Şübhəsiz, həqiqət hüquq-mühafizə orqanlarının araşdırmaları nəticəsində parlayacaq. İndiyə qədər olan bilgiyə görə, saxlanılan futbolçuların hamısı məsələnin birbaşa iştirakçısı deyil. Bəziləri var ki, onlar məhz cinayətdən xəbərdar olduqları halda, lazımi qurumları məlumatlandırmadığı üçün “radara düşüb”. Əsas şübhəlilər isə Muxtar Nəzərli və Mövlan Kərimovdu.

Maraq üçün qeyd edək ki, onlar cari mövsümün əvvəlində heyətə cəlb olunub. Məhz burda diqqətiçəkən bəzi məsələlər var ki, bu haqda daha detallı bilgi əldə etdikdən sonra oxucularımıza təqdim edəcəyik.

KƏNAN BAHADIR