“Səbail” Cavid Hüseynovun tələblərini qarşılaya bilməyəcək? – rəhbər şəxs belə dedi
“Səbail” Misli premyer-liqasının 14-cü turunda evdə “Qarabağ”a uduzdu – 0:3.
Məlum olduğu kimi, bu matç baş məşqçi postunda Şahin Diniyevi əvəzləyən Cavid Hüseynov üçün debüt xarakteri daşıyırdı. Mütəxəssis oyunsonrası mətbuat konransında səsləndirdiyi fikirlərlə sanki klub rəhbərliyinə mesaj ötürdü:
“Futbolçu kasadlığı yaşayırıq. Heyət geniş olanda hansısa sistem dəyişikliyi edə bilərik. Meydana hücumçusuz çıxırıq... İstəyərəm ki, məşqçilər korpusu geniş olsun”.
Bəs klub rəhbərliyi çalışdırıcının istəklərini qarşılaya biləcəkmi? Axı mövsümün əvvəlində “dənizçilər”in büdcəsi azaldılıb.
“Football-plus.az”ın sualını “Səbail”in icraçı direktoru Firuz Abdulla cavabladı:
“İmkan olduğu təqdirdə heyətin tam komplektləşdirilməsi yönündə addımlar atacağıq. İndi transferlər haqda danışmaq baxımından tezdi. Bəlkə də əldə olan heyətdən daha səmərəli istifadə etməyin yollarını axtaracağıq. Cavid Hüseynov həmin ifadələri işlədərkən həm də zədəliləri nəzərdə tutdu. Müəyyən çatışmazlıqlar var ki, qış fasiləsində aradan qaldıracağıq. Yenə deyirəm: mövcud imkanlar daxilində. Məşqçilər korpusu isə tam heyətlə fəaliyyət göstərir. Yeni fiziki hazırlıq üzrə məşqçiylə anlaşmışıq. Amma daha geniş tərkib olmayacaq”.
KƏNAN BAHADIR
Digər xəbərlər
