"Hansı oyunu yayınlayacağımıza özümüz qərar veririk" - Acun Ilıcalı ilə "CBC Sport" arasında münaqişə?
Bilindiyi kimi, "CBC Sport" Çempionlar Liqasının oyunlarını “yutub” kanalında canlı yayınlayır.
Belədə nəinki Azərbaycan, Türkiyə də daxil olmaqla, bir çox ölkədə yaşayan futbolsevərlər həmin yayını izləyir. Bununla bağlı maraqlı informasiya yayılıb. İddialara inansaq, "CBC Sport"un sözügedən matçları yayınlaması "Exxen" platformasının rəhbəri Acun Ilıcalının narazılığına səbəb olub. Həm də "TV 8" telekanalının rəhbəri olan türkiyəli iş adamı "CBC Sport"la əlaqə saxlayıb və iradlarını dilə gətirib. Çünki o, həmin oyunların məhz "Exxen"də yayınlanmasına və türkiyəli azarkeşlərin qarşılaşmaları həmin platformadan izləməsinə çalışır.
"CBC Sport"un Xəbərlər Xidmətinin direktoru Şəmsəddin Abbasovla danışdıq. Onun "Football-plus.az"a dedikləri:
"Yayılan bilgi həqiqətəuyğun deyil. Ümumiyyətlə, hüquqi cəhətdən bu məsələdə kiminsə kanalımzın siyasətinə müdaxilə etmək haqqı yoxdu. Çünki məhsul UEFA-ya məxsusdu. Biz Çempionlar Liqasının yayın hüquqlarını almışıq. Yəni "CBC Sport"la qarşı tərəfi təmsil edən şirkət arasında əməkdaşlıq müqaviləsi imzalanıb. Yayın hüquqları bizə aiddi. Məhz Acun Ilıcalı və ya "Exxen" rəhbərliyindən kimsə bizə rəsmi müraciət etməyib. Hansı oyunu yayınlayacağımıza özümüz qərar veririk. Belə şey olarsa, hüquqi çərçivədə cavab verməyə hazırıq".
KƏNAN BAHADIR
Digər xəbərlər
