Maddi problemlərdən heç cür qurtula bilməyən, hələ də yeni transfer İlkay Gündoğan daxil olmaqla bəzi oyunçularını gələn mövsüm üçün La Liqada qeydiyyatdan keçirə bilməyən ''Barselona'' rəhbərliyi çoxdan gözlənilən addımı həyata keçirdi.

"Football-plus.az" xəbər verir ki, belə ki, 1999-cu ildən fəaliyyətdə olan ''Barça TV'' iyulun 1-dən etibarən fəaliyyətini dayandırdı. Kataloniya nəhənginin maliyyə məsələləri üzrə yönəticilərindən biri olan Eduard Romeu İspaniya matbuatına açıqlamasında ''iqtisadi rəqəmləri, bu işin bizə vurduğu ziyanı hər kəs bilir'' ifadəsini işlədib. O, ötən il klubun rəsmi kanalının xərclərinin 14 milyon avro, gəlirinin cəmi 2 milyon avro olduğunu bildirərək bu durumda kanalın fəaliyyətini davam etdirməsinin mümkün olmadığını vurğulayıb. Əslində hər şeyin bu cür nəticələnəcəyi demək olar, aprelin sonlarından bəlli idi. Həmin vaxt kanalın 100-ə yaxın işçisi etiraz aksiyası keçirmişdi. İlk dəfə 1999-un iyulunda yayına başlayan kanal 24 il sonra boş qalmış studiyanı və çalışma məkanlarını göstərərək fəaliyyətini rəsmən dayandırdı. ''Barselona'' bundan sonra cəmi 14 işçi ilə internetdə ''streaming'' platforması vasitəsi ilə bəzi yayınlar həyata keçirəcək.