“Çempionatda 6 komanda iştirak edirdi. Vurğuladığınız kimi, “Araz-Naxçıvan”, “Baku Fire” və “Neftçi” İK ən güclülər sırasındadı. Geridə qalan mövsümdə çox maraqlı, yaddaqalan və rəqabətli oyunlar baş tutdu. Əsas hədəfimiz yüksək liqada qızıl medalları qazanıb Azərbaycanı Çempionlar Liqasında təmsil etmək idi. Təəssüf ki, finalda Naxçıvan təmsilçisinə məğlub olduq. Onları təbrik edirəm. İnşallah, qələbələr qazanıb bayrağımızı dalğalandıra biləcəklər. Ölkə kuboku uğrunda mübarizədə uduzmağımız gözlənilməz oldu. “Baku Fire”ın ən azı minimalhesablı qələbəsi olsaydı, daha yaxşı olardı. Matça rəqibdən iki dəfə ciddi hazırlaşdığımız halda acınacaqlı vəziyyətlə üzləşdik. Baş məşqçi kimi dəfələrlə kuboku qazanmağın sevincini yaşamışam. Həqiqətən heyrətamiz hisslərdi. Hansısa komanda qalib olursa, deməli, arxa planda çox əziyyət var. Bizə təbrik etmək düşər. Məğlubiyyətin isə səbəbləri çoxdu. Heyətin əksəriyyəti zədəli və xəstə idi. Qol, ayaq, bel ağrıları ilə meydana çıxdılar. Hamının bir nəfər kimi əlindən gələni etdiyinə şübhəm yoxdu. Mövsüm boyunca yüksək liqa matçlarında çox yorulmuşduq. Üstəlik “Baku Fire”ın heyətindəki legionerlər çox güclüdü. Ümid edirəm ki, növbəti mövsümdə də çıxışlarını belə davam etdirəcəklər. Ölkədə nə qədər güclü komanda olsa, o qədər yaxşıdı. Həm də beynəlxalq yarışlara hazırlıq kimi dəyərləndirilən ölkədaxili yarışlarda rəqabət vacibdi. Məlumdu ki, “Araz-Naxçıvan” böyük fərqlə başqa klublardan üstündü. Oyuna çıxmamış nəticənin necə olacağını asanlıqla təxmin edirlər. Çətin rəqiblərin sayı çox olsa, yüksək liqa daha rəngarəng olar. “Neftçi” İK-ə gəlincə, artıq növbəti mövsümlə bağlı hazırladığım planı rəhbərliklə müzakirə etmişəm. İstəyirəm ki, heyəti gəncləşdirim. Onlara üstünlük vermək lazımdı. Bu sahəyə marağı olan çoxlu gənc var ki, onların potensialını dəyərləndirmək lazımdı. Bununla yanaşı, təcrübəli legionerlərin də kluba cəlb edilməsinin tərəfdarıyam. Yeni gələcək gənclər onlarla yanaşı oynadıqca daha tez püxtələşəcək. Onları milliyə hazırlayıb ölkəyə təcrübəli futzalçılar qazandırmaq niyyətindəyəm. Hələ klubdan ayrılacaq və yeni gələcək futzalçıların adı bəlli deyil. Bu barədə yekun qərarların veriləcəyi iclas baş tutacaq. Hər birinə təşəkkür edib yola salacağıq. Burda deyə bilmərik ki, sən bizi qane etmədin, get. Aşkar görünür ki, hətta yaşlı futzalçılar belə gözləniləndən artıq meydanda oldu. Dediyim kimi, hədəflər təyin olunur və onlara çatmaq üçün dəyişikliklər labüddü. İnanıram ki, növbəti mövsüm üçün atılacaq addımlar faydalı olacaq”.