Türkiyə mətbuatı növbəti dəfə maraqlı iddia ilə çıxış edib. “Sözcü” qəzetinin məlumatına inansaq, SOCAR "Qalatasaray"ın sponsoru olacaq.

Xəbərdə bildirilir ki, Türkiyə nəhənginin ev oyunlarını keçirdiyi "Türk Telekom Arena", yaxud Əli Sami Yen İdman Kompleksi dövlət neft şirkətinin adını daşıyacaq. "Sarı-qırmızılar"ın formasının ön hissəsində isə SOCAR-ın da adı yazılacaq. Bundan başqa, şirkətin bir ulduz futbolçunun transfer xərclərini üzərinə götürdüyü qeyd olunub. Tərəflər arasında 4 illik müqavilənin bağlanacağı gözlənilir. Razılaşma baş tutsa, "Qalatasaray" illik 20-25 milyon avro gəlir əldə edəcək. Maraq üçün bildirək ki, bir neçə ay əvvəl Türkiyə mətbuatı SOCAR-ın Türkiyənin digər nəhəngi "Fənərbaxça"nın da sponsoru olacağı barədə xəbərlər dərc etmişdi.

Şirkət dünən xəbərə dərhal münasibət bildirib və bunun həqiqətə uyğun olmadığını bəyan edib:

Bilirik ki, Azərbaycanda futbol sektoruna adı çəkilən şirkət nəzarət edir. Bu sahəyə ümumilikdə 40-45 milyon manata yaxın maliyyə ayırır. Amma hələ də futbolumuzda çox böyük problemlər var. “Sözcü”nün iddiasına inansaq, 4 il ərzində “Qalatasaray”a 20-25 milyon avro pul xərclənməsi nəzərdə tutulub. İndiki məqamda Azərbaycanın müxtəlif şəhərlər və rayonlarında stadion problemləri var. Ölkənin futbol təsərrüfatına nəzarət edən qurum belə problemin olduğu vaxtda nə üçün Türkiyə klubuna maliyyə ayırsın? Axı bunun bizə heç bir faydası yoxdu.

Tutaq ki, azərbaycanlı futbolçular “Qalatasaray”ın akademiyasında təcrübə toplayacaq. Belə layihələr dəfələrlə olub və çoxu nəticəsiz qalıb. Bunun üçün illik 20-25 milyon avro xərcləməyə ehtiyac yoxdu. Elə qurum həmin məbləğə ölkədə 5-10 min tutumluq 3-4 stadion tikdirə bilər. Bu, 4 il ərzində ortalama 14 arenanın araya-ərsəyə gəlməsi deməkdi. Azərbaycan futbolunun ən yaralı yeri də elə məhz stadiondu. Gəncə kimi şəhərin arenası bərbad gündədi. AFFA və PFL normal stadion tapa bilmir ki, premyer-liqaya, 1-ci diviziona komanda buraxsın.

Qoyaq stadion məsələsini kənara. Bu məbləğə 10 illik dövlət layihəsi tərtib etmək olar. Elə uşaq futbolu ilə bağlı. Ölkənin hər yerində futbol akademiyaları, məktəbləri, liseyləri yaratmaq olar ki, bu da 10 il ərzində effekt verə bilər. Yaxşı, bunu da etməyin. Elə 20-25 milyon avronu şirkətin sponsorluq etdiyi “Neftçi”yə xərcləsələr, daha möhtəşəm olar. Uzun illərdi flaqman problemlərdən qurtula bilmir. Klubun bazası tam təmir olunmayıb, əsas komanda avrokuboklarda uğura həsrətdi. “Qalatasaray”a sponsorluq edincə, “Neftçi”nin büdcəsini artırın ki, hər il Avropada nəticə qazanan klub kimi formalaşsın.

Yəni ölkədə futbolun inkişafı və ya sosial layihələr üçün ayrılan vəsaiti başqa yerə xərcləməyə ehtiyac yoxdu. Elə özümüz üçün nəsə edilsə, daha yaxşı olmazmı?

İLKİN SULTANLI