Halk Türkiyəyə gələsi olmadı
Ötən yay Mario Balotellini əldən buraxan ''Adana Dəmirspor'' bu qış Tyemue Bakayokonun transferini bitirməyə hazırlaşır.
Football-plus.az xəbər verir ki, icarə əsasında ''Milan''da top qovan və müqavilə ilə ''Çelsi''yə məxsus olan 28 yaşlı fransalı yarımmüdafiəçinin qısa müddətdə Türkiyəyə gələrək 2026-cı ilə qədər olan müqaviləyə imza atacağı gözlənilir.
Bu arada adanalıların prezidenti Murat Sancak Halk və Luis Suareslə bağlı da açıqlamalar verib. Çünki klub hər iki ulduz futbolçu ilə, xüsusilə də Halkla uzun müddət ciddi şəkildə maraqlanırdı. Amma ''Atletiko Mineyro''nun üzvü Türkiyəyə gəlməyəcək. Səbəbini Murat Sancakdan eşidək:
''Halkın həm özü, həm də həyat yoldaşı Türkiyəyə gəlməyə çox həvəsli idi. Buraları araşdırdıqdan sonra gəlməyə razılıq verdilər. Amma klubu onu buraxmadı. Çox ciddi pullar təklif etmişdim. Az qala yayın gəlirimizin hamısını ona verəcəkdim. 2,5 illik müqavilə və bonuslarla birlikdə illik 6 milyon avroya yaxın məbləğ təklif etdim. Təəssüf ki, alınmadı. Məsələ artıq bitib. Bu andan sonra gəlmək şansı yoxdu. Klubu buraxmadıqdan sonra bizim bununla razılaşmaqdan başqa çarəmiz qalmır. Suareslə də təmaslarımız oldu. Hətta görüşüb söhbət etdik. Amma onun da həyat yoldaşı bura gəlmək istəmədi. Göründüyü kimi gah futbolçunun klubu ilə, gah da həyat yoldaşları ilə problemlər yaşayırıq''.
Digər xəbərlər
