''Beşiktaş''da qalıb-qalmayacağı hələ də bəlli olmayan qapıçı Ərsin Destanoğlu ilə bağlı yeni xəbər var.

"Football-plus.az" xəbər verir ki, ''Qartal''ın öz yetirməsi olan 24 yaşlı əlcək sahibinin müqavilə müddəti iyunun 30-da başa çatır.

Daha öncə Ərsinin İspaniya təmsilçisi ''Jirona'' və Səudiyyə Ərəbistanı təmsilçisi ''Əl-İttifaq''ın maraq dairəsində olduğu bildirilmişdi. İndi isə Acun Ilıcalının sahibi olduğu ''Hall Siti'' variantı ortaya çıxıb.

Türkiyə mətbuatının yazdığına inansaq, Acun Destanoğluna rəsmi müqavilə təklif edib. Türkiyəli iş adamı sosial şəbəkədə tətilindən bir şəkil paylaşıb. Sonra məlum olub ki, Ərsin də məhz həmin bölgədə istirahət edir. ''Hall Siti''nin gələn mövsüm premyer-liqada oynayacağını nəzərə alsaq, sözsüz ki, bu transfer Ərsin üçün irəli atılmış addım ola bilər. Ancaq nə o, gələcəyi ilə bağlı qərar verib, nə də ''Beşiktaş'' onunla bağlı qərar verib. Rəhbərliyin istedadlı qapıçı ilə müqaviləsi bitmədən öncə sonuncu dəfə görüşəcəyi güman edilir.

Xatırladaq ki, Ərsin Türkiyə yığmasının geniş heyətində yer alsa da, mundiala yollanan 26 nəfərlik heyətə düşə bilmədi. O ötən mövsüm 32 oyunda iştirak edərək 34 qol buraxıb və 10 görüşdə qapısını toxunulmaz saxlayıb.