Futbol dünyasında populyar simalardan biri olan Halk karyerasını Türkiyə çempionatında davam etdirə bilər.

Belə ki, “Adana Dəmirspor” 36 yaşlı braziliyalı forvarda ciddi maraq göstərir. Adana təmsilçisində bir sıra məşhur futbolçuların top qovması heç kimə sirr deyil. Mario Balotelli mövsümün əvvəlində komandanı tərk etdikdən sonra adanalılar tanınmış rusiyalı futbolçu Artyom Dzyubanı transfer etdi. Amma 34 yaşlı hücumçu Türkiyə futboluna alışa bilmədi. Cəmi 5 rəsmi oyuna çıxan və 1 qol vuran Dzyuba yaxınlarda klubla müqaviləsini pozaraq ayrılmaq qərarına gəldi. Bu üzdən “Adana Dəmirspor” qış transfer dönəmində hücum xəttini gücləndirməyi planlaşdırır. Halka gəlincə, tam adı Givanildo Vieyra de Souza olan bu futbolçu daha öncə “Portu” və “Zenit”də adından söz etdirib.

2016-20-ci illərdə Çində top qovan təcrübəli oyunçu 2021-dən bəri vətənində çıxış edir və “Atletiko Mineyro”nun şərəfini qoruyur. Əvvəlki illərdə Halkın bir neçə dəfə Türkiyəyə gəlmək şansı olmuşdu. Məsələn, 2021-in yayında “Beşiktaş” bu oyunçuya ciddi maraq göstərmişdi. Amma Halk vətəninə yollanmağa üstünlük vermişdi. “Atletiko Mineyro”da indiyə qədər 114 rəsmi oyunda 65 qol, 18 məhsuldar ötürməlik performans sərgiləyən Halk karyerası ərzində 687 qarşılaşmada 369 qol, 197 məhsuldar ötürmə ilə fərqlənib. “Adana Dəmirspor”un ekstravaqant prezidenti Murat Sancak bir müddət öncə “Balotelli vaxtında ayrılsaydı, Suares, Pato, Halk kimi futbolçulardan birini alacaqdıq” açıqlaması ilə diqqəti çəkmişdi. Deyilənə görə, o, Halkı komandasında görmək arzusundadı. Amma “sambaçı”nın klubu ilə müqavilə müddəti davam etdiyindən “Adana Dəmirspor” ilk növbədə “Atletiko Mineyro” ilə anlaşmalıdı.