Türkiyə mundialdakı bərbad çıxışı ilə türk dünyasını məyus etdi. Komanda qrupun ikinci oyununda bir hissədən çox azlıqda oynayan Paraqvaya 0:1 məğlub olmaqla pley-off şansını itirdi.

Təbii ki, Türkiyənin heyətində yaxşı mənada hansısa bir futbolçunu fərqləndirmək çətindi. Amma bir isim var ki, həm ayıq olması, həm mübarizə əzmi, həm də final fitindən sonra hönkür-hönkür ağlaması ilə türkiyəli futbolsevərlər tərəfindən ən azı xoş sözlərə layiq görüldü. Söhbət Mərt Müldürdən gedir.

Sağ müdafiəçi əvvəlcə ilk yarıda standart zərbə zamanı Türkiyənin matçdakı ən real qol fürsətini yaxaladı. Onun baş zərbəsindən sonra top tirə, sonra dirəyə dəyərək meydana döndü. Fasilə ərəfəsində isə məhz bu futbolçunun ayıqlığı nəticəsində Paraqvay azlıqda qaldı. Oyunun dayandığı bir məqamda Migel Almiron əli ilə ağzını tutaraq Mərtə nəsə dedi. Yeni qaydalara əsasən futbolçuların əl və ya forma ilə ağızlarını bağlayaraq rəqibə söz demələrinə icazə yoxdu. Mərt dərhal yan xətt hakiminə bunu xatırladaraq futbolçunun cezalanmasını istədi. Oyunu yüksək səviyyədə idarə edən salvadorlu hakim İvan Barton monitora yollanaraq epizodun təkrarını izlədikdən sonra Almirona birbaşa qırmızı vərəqə göstərdi.

Beləliklə, mundialda yeni qərar ilk dəfə məhz Türkiyənin oyununda tətbiq olundu. Müldürün istəkli oyunu məğlubiyyətdən qurtulmaq üçün yetərli olmadı. Final fitindən sonra isə ən çox duyğusal anlar yaşayan futbolçu məhz Mərt oldu. Yerə oturaraq göz yaşlarını saxlaya bilməyən ''Fənərbaxça''lı ismin bu görüntüləri sosial şəbəkələrdə sürətlə yayıldı.

Onun son paylaşımının altında da futbolsevərlər xoş sözlər yazaraq Mərti tərifləyiblər.