Düzdü, başa çatan mövsümü “qızıl dubl”la tamamlayan “Sabah” “Qarabağ”ı ölkədaxili yarışlarda qabaqlaya bildi. Ancaq “köhlən atlar”ın avrokuboklarda imza atdığı uğurları nəinki kölgədə qoymaq, hətta təkrarlamaq belə çətindi. Odu ki, ölkəmizi Çempionlar Liqasında təmsil edəcək komanda “bayquşlar” olsa da, ağdamlıları diqqətdən kənarda saxlaya bilmərik. Çünki futbol nə qədər möcüzələri, istənilən cür sürprizi xoşlasa da, təcrübə bir çox hallarda ön plana çıxır və heç şübhəsiz, qalan komandalarımızın avrokuboklarda “Qarabağ” qədər təcrübə toplaya bilməsi üçün uzun illər lazımdı. Bir çoxu artıq bu yöndə müəyyən qədər biliklərə sahib olsa da…

Kəsəsi, bu gün yenə arzularımızın gerçəkləşməsi üçün böyük ölçüdə “Qarabağ”dan asılı durumdayıq. “Sabah”, “Neftçi” və “Zirə”nin də avrokuboklarda “köhlən atlar”la birgə irəliləyəcəyini ümid edib, sözümüzün canına keçid alaq.

Elvinlə Abbasdan başqa hamı bir yerdə
Ağdamlılar yeni mövsümə hazırlığı sürətlə davam etdirir. Bəli-bəli, sürətlə. Yay təlim-məşq toplanışına hamıdan əvvəl başlayan “Qarabağ” hazırda Bakıdadı. İlk mərhələ iyunun 21-dək davam edəcək. “Köhlən atlar” əvvəlcə paytaxtda yoldaşlıq görüşündə qüvvəsini sınayacaq. Onlar “Zirə” ilə qarşılaşacaq. Bu oyun bu gün “Azərsun Arena”nın məşq meydançasında keçiriləcək və saat 18.00-da başlayacaq. Komanda iyunun 22-dən iyulun 2-dək Avstriyada olacaq. Ağdamlılar iyulun 1-də “Metallist” və “Fenerentsvaroş” ilə yoxlama oyunları keçirəcək.

İki yeni futbolçu və Medina erasının sonu!
Mövsümlərarası fasilədə Jali Muaddib və Zakaria Savo ilə güclənən “köhlən atlar” qəzetimizin işıq üzü görmədiyi günlərdə növbəti futbolçu keçidlərini gerçəkləşdirdi. Klub çərşənbə axşamı Samuel Lobatonun, srağagün isə Bruno Lanqonun transfer olunduğunu elan etdi.

Maraq üçün qeyd edək ki, Lobato Portuqaliya “Portimonense”sindən alınıb. 24 yaşlı portuqaliyalı yarımmüdafiəçi ilə 3 illik müqavilə imzalanıb. O, 28 nömrəli formanı geyəcək. 2025-ci ildən “Portimonense”də çıxış edən orta sahə oyunçusu ilk dəfə legioner həyatı yaşayacaq. Lobato 2015-21-ci illər aralığında Portuqaliya “Sportinq”inin akademiyasında yetişib. O, karyerası ərzində həm də “Famalikao”, B SAD və “Tondela”da çıxış edib. 184 sm boya malikdi. Lobato Portuqaliyanın U-17 millisinin də formasını geyib. Samuelin “Transfermarkt”dakı bazar dəyəri 300 min avrodu. Futbolçu 2025/26 mövsümündə ölkə kubokunda 1, çempionatda isə 23-ü start heyətində olmaqla 29 matçda tər töküb. “Futbol ili” ərzində 2204 dəqiqə meydanda olub və bu müddətdə 2 qol, 1 məhsuldar ötürməyə imza atıb, 9 sarı vərəqə alıb.

Lanqa isə İspaniya “Almeriya”sından alınıb. Mozambikli müdafiəçi ilə 3 illik müqavilə imzalanıb. 28 yaşlı sol cinah oyunçusu 5 nömrəli formanı geyəcək. O, bu ilin ilk yarısını icarə əsasında Portuqaliya “Eştrela”sında keçirib. Futbolçu cari mövsümdə “Pafos”un heyətində ölkə çempionatında 7, Çempionlar Liqasının təsnifat mərhələsində 4, əsas mərhələsində isə 7 matçda forma geyib. “Eştrela”da hamısı start heyətində olmaqla 11 qarşılaşmada meydanda olub. Ümumiyyətlə, o, başa çatan mövsüm ərzində rəsmi oyunlarda 1216 dəqiqə top qovub. Lanqa karyerası ərzində ölkəsində “Blek Bullz”, “Maşakene”, Portuqaliyada “Amora”, “Vitoriya”, “Şaveş”, “Eştrela” və Cənubi Kiprdə “Pafos”un da formasını geyib. 2021-ci ildən indiyə qədər Mozambik yığmasının heyətində 37 oyun keçirib, 1 qol vurub, 6 məhsuldar ötürmə verib. 178 sm boya malik müdafiəçinin “Transfermarkt”dakı bazar dəyəri 1 milyon avrodu.

Vitse-çempionu tərk edən isim isə Kevin Medinadı! “Qarabağ” onunla qarşılıqlı razılıq əsasında yolları ayırdığını açıqladı. Əldə etdiyimiz məlumata görə, kolumbiyalı karyerasını Malayziyanın son çempionu “Darul Təzim”də davam etdirəcək. İş ondadı ki, müdafiəçinin “köhlən atlar”la müqaviləsinin müddəti hələ gələn ilin yayında başa çatacaqdı. Görünür, ağdamlılar Medinanın getmək istəyini nəzərə alıb və ona xidmətləri müqabilində jest edib – müqaviləyə vaxtından əvvəl xitam verməyə razı olub.

Oyunçunun xidmətləri demişkən, Medina 2020-ci ildən “Qarabağ”ın şərəfini qoruyurdu. 33 yaşlı kolumbiyalı son 6 il ərzində “köhlən atlar”ın heyətində 204 matçda forma geyib, 6 qol, 7 məhsuldar ötürməyə imza atıb.

Yenə gedənlər də olmalıdı, gələnlər də!
Əlbəttə, həyatda olduğu kimi, futbolda da enişlər və yüksəlişlər var. Əsas odu ki, Çempionlar Liqasında mübarizəni dayandırandan sonra ciddi eniş yaşayan ağdamlılar artıq yüksəlişə keçməyə hazırlaşır. Ancaq bu ərəfədə daha bir neçə futbolçuyla yolların ayrılması məqsədəyğundu. Çünki indiyədək Toral Bayramov, Emmanuel Addai, Ramil Şeydayev və Sami Mmae ilə vidalaşan “Qarabağ” 34 yaşı haqlayan Bədavi Hüseynov və Abdulla Zubirlə avrokuboklarda ciddi uğur qazana bilməz. Düzü, Aleksey Kaşukun da “köhlən atlar” üçün faydalı iş görə bilməyəcəyi göz önündədi. Bununla belə, 4 qapıçının varlığı ağdamlılar üçün əlavə üstünlük qazandırmır. Yəqin ki, Qurban Qurbanov bu yöndə də hansısa addımlar atmağa çalışacaq.

Gücləndirilməli olan mövqelərə gəlincə, təbii ki, ilk iş müdafiə xəttiylə bağlı olmalıdı. Axı Medinanın gedişi mərkəz, Elvinlə bağlı durumun hələ davam etməsi isə sol cinah müdafiəçisinin alınmasını ən böyük zərurətə çevirib. Bununla belə, heyətdə mərkəz hücumçusunu da ehtiyac duyulur. Bu üzdən, ümidliyik ki, “Qarabağ”ın heyətlə bağlı islahatları hələ başa çatmayıb və qarşıdakı günlərdə növbəti addımlar da atılacaq. Arzumuz isə təbii ki, “köhlən atlar”ın Avropa Liqasının əsas mərhələsinə vəsiqə qazanmasıdı. Elə Qurban Qurbanovun hədəfi də məhz budu!

KƏNAN BAHADIR