Superliqaya qayıtdıqdan sonra ünlü isimləri heyətinə qatmağı bacaran ''Adana Dəmirspor'' daha bir ulduz futbolçunu Türkiyəyə gətirmək üzrədi.


Football-plus.az xəbər verir ki, söhbət fransalı dayaq yarımmüdafiəçisi Tyemue Bakayokodan gedir. Ötən mövsümdən bu yana icarə əsasında ''Milan''ın şərəfini qoruyan 28 yaşlı futbolçu müqavilə ilə ''Çelsi''yə məxsusdu. Bakayoko faktiki olaraq son vaxtlar meydana çıxmır. Ona görə də ''Milan'' onu buraxmağın əleyhinə deyil.

Özü də ''Adana Dəmirspor'' 6 aylıq icarəyə görə 3 milyon avro ödəməyə hazırdı. Bunu İtaliya mətbuatı iddia edir. Düzdü, Bakayoko Türkiyəyə getməklə bağlı bir qədər tərəddüd içində idi. Amma deyilənə görə bu transferdə israr edən adanalıların baş məşqçisi Vinçentso Montella tanınmış oyunçunu Türkiyəyə gəlməyə razı sala bilib. Xatırladaq ki, ''Çelsi'' bu oyunçunu 2017-də ''Monako''dan 40 milyon avroya transfer etmişdi. Amma o vaxtdan bu yana Bakayokonun karyerası heç də uğurlu şəkildə irəliləmir. ''Milan''dan başqa o, bu illər ərzində ''Monako'' və ''Napoli''yə də icarəyə verilib.