Xavi özü ilə İnyestanı Pedri və Qavi ilə müqayisə etdi
“Barselona”dakı işi hələ ki birmənalı qəbul olunmayan və tez-tez tənqid atəşinə tutulan baş məşqçisi Xavi Ernandes kluba həsr olunmuş sənədli filmin təqdimat mərasimində açıqlamalar verib.
Football-plus.az xəbər verir ki, bu vəzifədə çalışmağın çətinliyindən, sabiq komanda yoldaşı Lionel Messinin DÇ-ni qazanmasından və “Barsa”nın gələcəyi sayılan Pedri ilə Qavidən danışan 42 yaşlı mütəxəssis bunları deyib:
“DÇ-nin finalı futbolsevərlərə inanılmaz emosiyalar bəxş etdi. Bu, mənim gördüyüm ən maraqlı oyunlardan biri oldu. Dembele və Kunde üçün üzgünəm. Amma fikrimcə, Argentina güclü olan tərəf idi və laqyiqli qələbə qazandı. Leo Messini də ayrıca təbrik etməliyik. O, mənim dostumdu və tarixin ən yaxşı oyunçusudu. Messi DÇ-ni qazanmadan karyerasını bitirə bilməzdi. Avropa Liqası? Düzünü desəm, bu turnirin himni heç xoşuma gəlmir. Daha çox ÇL-in himnini bəyənirəm. Bəlkə də inkişaf etməyimiz üçün bu turnirdə oynamalıyıq. Amma bu ideya xoşuma gəlmir. İstəmədiyimiz turnirdə oynamaq məcburiyyətində qalmağımız bizi qıcıqlandırır! Bununla belə, turnirin bərpa olunmasını səbirsizliklə gözləyirəm. Ümid edirəm ki, heç olmasa, yarımfinala və ya finala qədər irəliləyə biləcəyik. Bunun yanına La Liqa çempionluğunu da əlavə etsək, deməli, mövsümü uğurlu saymaq olar. Mən həmişə demişəm ki, “Barsa”nı çalışdırmaq emosional cəhətdən çox çətindi. Çünki hisslərinə nəzarət etməli, həvəsdən düşməməli və ya əksinə, eyforiyaya qapılmamalısan. Xüsusi bir komandamızın olduğuna inanmalısan. Çünki bizdə həqiqətən də xüsusi özəlliklər var və insanlar bunu görür. Məndən tez-tez Pedri və Qavi haqda soruşurlar. Etiraf edim ki, Andres İnyesta ilə mən 20 yaşımız olanda onların indiki səviyyəsində deyildik! Elə Erik Qarsiya və Ansu Fati də yaşına görə inanılmaz futbol sərgiləyir. Qavinin nəinki oyundakı, hətta məşqlərdəki istəyi, ehtirası, rəqabət aparmaq arzusu üst səviyyədədi. Əminliklə deyirəm ki, biz bu yaşda belə futbol intellektinə malik deyildik”.
Digər xəbərlər
