Acun Ilıcalının sahibi olduğu “Hall Siti”də Şota Arveladze dönəminin başa çatdığını xəbər vermişdik.

Çətin dönəmdən keçən və çempionşipdə son 5 turun hamısında məğlub olan “pələnglər” 24 komandalı turnirdə 20-ci pillədə qərarlaşıblar (dünənki oyunun nəticəsi nəzərə alınmayıb – red.). Baş məşqçi postuna namizədlər arasında Karlos Kravalyal, Karlos Korberan və Skott Parkerlə yanaşı, Sərgən Yalçının da adı hallanır. Bu da təəccüblü deyil. Acunla Sərgən uzun illərdi dostdu. Yalçın daha öncə Ilıcalının bir neçə televiziya layihəsində iştirak edib. Bu arada türkiyəli iş adamı məşqçi axtarışı ilə bağlı İngiltərə mətbuatına diqqətçəkən açıqlamalar verərək bunları deyib:

“Bir çox mütəxəssislə təmasdayıq. Klub üçün ən uyğun məşqçini tapmağa çalışırıq. Bizə oyunçuların potensialından ən yaxşı şəkildə faydalana biləcək bir məşqçi lazımdı. Çünki çempionşip səviyyəsində güclü və rəqabətədavamlı bir heyət qurduğumuza inanırıq. Bu yay bizə hücumameyilli futbol oynamağa yardım edə və top ayağında olarkən istedadını göstərə biləcək oyunçular almışıq. Çünki pozitiv futbol izlətdirmək istəyirik. Əslində mövsümə yetərincə uğurlu başladıq. Amma sonra zədə epidemiyası baş qaldırdı. Əvvəlcə ən yaxşı oyunçularımızdan olan Allahyar Səyyadmaneş, sonra Ozan Tufan, Tette və Seri sıradan çıxdı. Belə oyunçular olmadıqdan sonra yaxşı nəticəyə ümid bəsləmək çətindi. Yeganə istəyim bu oyunçulara uyğun bir məşqçi tapmaqdı. Çünki baş məşqçinin düşüncəsi və baxış tərzi oyunçuların xarakterinə uyğun olmadıqda komanda yaxı oynaya bilməz. Bizim oyunçulara “geriyə çəkil və müdafiədə otur” tapşırığını versən, onlar bunu edə bilməz. Çünki tərzləri buna uyğun deyil. Adətən, belə çətin duruma düşən klublar üçün yeni məşqçi tapmaq qəlizləşir. Amma biz çempionşipin ən çox diqqət mərkəzində olan klublarından biriyik. Bu klubun rəhbərliyinə, heyətinə və fanatlarına baxan hər kəs burda gələcək adına bir ümid olduğunu görə bilər. Mətbuatda bir çox məşqçinin adı hallanır. Onların bəziləri mənimlə olan yaxınlığına, bəziləri isə keçmişdə əldə etdikləri uğurlara görə diqqət mərkəzinə düşüb. Belə xəbərlərin çıxması normaldı. “Uiqan”la oyundan sonra, yəni bazar gününə qədər yeni məşqçinin adını açqılamağa çalışacağıq. Üzümü fanatlarımıza tutaraq demək istəyirəm ki, biz bir ailəyiksə, problemləri də birlikdə həll etməliyik. İndi hər kəsə bizim çətin zamanda necə birləşdiyimizi göstərmək üçün ən ideal zamandı. Bu durumdan çıxmaq üçün önümüzdə hələ çox vaxt var”.

Portuqaliya mətbuatının son iddiasına görə “Hall Siti”nin başına Pedro Martinş keçəcək. 52 yaşlı mütəxəssis son üç ildə “Olimpiakos”u çempion etsə də, avqustun əvvəllərində istefaya göndərilmişdi.