Türkiyəli iş adamı Acun Ilıcalının sahibi olduğu ''Hall Siti'' nəhayət uğursuzluq zolağından çıxdı.

''Pələnglər'' dünən çempionşipin 13-cü turu çərçivəsində evdə ''Viqan'' ilə qarşılaşdılar. Qonaqlar artıq 14-cü dəqiqədə hesabı açsalar da, meydan sahibləri əzmkarlıq nümayiş etdirdilər. Qolları türkiyəli futbolsevərlərə gözəl tanış olan futbolçular vurdu. Sabiq ''Fənərbaxça''lı Dimitris Pelkas hələ fasiləyə qədər bərabərliyi təmin etdisə, ikinci yarının ortalarında sabiq ''Dənizlispor''lu Oskar Estupinyan komandasına qələbə qazandırdı. Bu mövsüm 8-ci qolunu vuran 26 yaşlı kolumbiyalı forvard çempionşipdə bombardirlər yarışına başçılıq edir. ''Hall Siti'' bununla da 5 oyunluq məğlubiyyət seriyasına son qoyaraq mövsümdə 4-cü qələbəsini qazandı.

Yeri gəlmişkən, Acunun oyundan sonra Pedro Martinş ilə çəkdirdiyi şəkili ''instaqram''da paylaşması diqqət çəkdi. Artıq heç bir şübhə yoxdu ki, ''Hall Siti''nin yeni baş məşqçisi məhz bu portuqaliyalı mütəxəssis olacaq! Xatırladaq ki, Ilıcalı bir müddət öncə ardıcıl uğursuz nəticələrdən sonra Şota Arveladze ilə yollarını ayırmışdı.