Federer getdi, bəs Nadalla Cokoviç?
Rocer Federerin tennis karyerasını bitirdiyini bilirsiz.
Bəs ən azı onun qədər məşhur olan Rafael Nadalla Novak Cokoviç bu mövzuda nə düşünür? Federerlə vidalaşma mərasimində göz yaşını saxlaya bilməyən “Böyük dəbilqə” turnirlərinin 22 qat qalibi Rafael Nadal emosional reaksiyasını belə izah edib:
“Günlərin birində getmək məqamının yetişəcəyini bilirəm. Yaşın 36-ya çatıbsa, anlayırsan ki, karyeranın son mərhələsindəsən. Ancaq indi mən bu haqda düşünmürəm. Emosiyalarım heç də bununla bağlı deyildi. Sadəcə, Federerə münasibətdə heyranlıq hissindən doğurdu. Bu, sadəcə, sentimental məqam idi”.
“Böyük dəbilqə” turnirlərinin 21 qat qalibi, 35 yaşlı Novak Cokoviç də karyerasını davam etdirməkdə israrlıdı:
“Hələ də tennis oynamaq istəyirəm. Hərçənd nəyə nail olmaq mümkündüsə, ona da nail olmuşam. Hələ də ən yüksək səviyyədə oynamaq arzum və ehtirasım var. Leyver Kubokunda oynamaqda qərarlı idim, yenə də oynamaq istəyirəm, Təl-Əviv turniri bu mənada mənim üçün ideal seçimdi”.
Cokoviçin xatırlatdığı ATP-250 kateqoriyalı Təl-Əviv turnuru sentyabrın 26-da start götürüb və oktyabrın 2-nə qədər davam edəcək. Serb tennisçi İsrail paytaxtında həm fərdi yarışda çıxış edəcək, həm də yerli tennisçi Conatan Erlixlə birgə cütlərin mübarizəsinə qoşulacaq.
Digər xəbərlər
