Ötən həftə Nik Kiryosu məğlub etməklə Uimbldon turnirinin qalibi olan Novak Cokoviçin sabiq məşqçisi Nikola Piliç serbi dünyanın ən yaxşı tennisçisi sayır: “Cokoviç bütün parametrlər üzrə Federerlə Nadaldan yaxşıdı. O, 374 həftə ərzində dünyada nömrə 1 olub. Başqa heç kim bütün “Böyük dəbilqə” turnirlərini minimum iki dəfə qazanmayıb (yanılır, Nadal da bunu bacarıb – red.). Və Novak, demək olar ki, bütün tennisçilərlə duellərdə müsbət balansa malikdi. Əlbəttə, Nadal qarşısında da şlyapamı çıxarıram. Yüzillər ərzində heç kim “Rolan Qarros”u 14 dəfə qazanmayıb”.
Xatırladaq ki, 21-ci dəfə “Böyük dəbilqə” turnirini qazanan Cokoviç bu göstəricidə Rocar Federeri (20) arxada qoymaqla təmiz 2-ci yerə yüksəlib. “Böyük dəbilqə” turnirlərində titul sayına görə lider isə Rafael Nadaldı (22). Amma Cokoviç “Böyük dəbilqə” turnirlərində final sayına (32) görə liderdi. O, 31 dəfə həlledici oyuna çıxan Federeri məhz Londonda arxada qoydu.