“Böyük dəbilqə” turnirlərinin 20 qat qalibi, dahi Rocer Federer karyerasını bitirdiyini elan edib.

41 yaşlı isveçrəli çoxsaylı zədələr üzündən yüksək səviyyədə çıxışını davam etdirə bilməyəcəyini deyib. Onun sonuncu turniri sentyabrın 23-25-i aralığında Londonda keçiriləcək Leyver Kuboku olacaq.

Əfsanəvi tennisçi korta sonuncu dəfə ötən ilin iyulunda – Uimbldon turnirində çıxıb və 1/4 finala qədər irəliləyib. Federer 8 dəfə “Uimbldon”un, 6 dəfə “Australian Open”in, 5 dəfə ABŞ Açıq Tennis Çempionatının, 1 dəfə isə “Rolan Qarros”un qalibi olub. Bazeldə dünyaya gələn tennis əfsanəsi ümumilikdə 103 ATP turnirini qazanıb. Kişi tennisinin tarixində bu mənada yalnız Cimmi Konnorsdan (109) geri qalır. İsveçrəli 310 həftə dünyanın birinci raketkası olub. Ötən ilin martına qədər bu, tarixin ən yaxşı nəticəsi idi. Ancaq Novak Cokoviç Federerin rekordunu yenilədi. Əvəzində isveçrəli ardıcıl 237 həftə 1-ci pillədə dayanmaqla mütləq rekordçudu. Bundan başqa, Federer Devis kubokunun və 2008-ci ildə keçirilən Pekin Olimpiadasının da qalibidi (cütlərin yarışında).

Federerin gedişi kədərli olsa da, hər şeyin öz vaxtı var. Rocer fəxri kürsüdən aşağı ensə də, özünün solğun kölgəsinə çevrilmədi. Həmişə onun üçün xarakterik olan ölçü-məsuliyyət hissinin təsiri altında, şəxsiyyətinə yaraşan şəkildə getmək qərarı verdi. İsveçrəli həmişə idman dünyasında özünəməxsus etalon, nümunə olub. Allah ona qəhrəman və kumir olmaq üçün hər şey vermişdi. Rocerin ideal texnikası, ideal davranışı həm də oyuna və kortdakı rəqiblərinə ideal münasibət ilə birləşirdi. Heç vaxt rəqiblərinə yuxarıdan aşağı baxmır, şöhrətin zirvəsində belə kimsəni aşağılamağa çalışmırdı. İstənilən məqamda və şəraitdə centlmenliyini qoruyurdu. Məhz bütün bu sadaladığımız məqamlar üzündən tennis dünyası onun yoxluğunu dərindən hiss edəcək, tennissevərlərin gözü kortda Federeri axtaracaq. Amma kortu tərk etmək hələ həyatın sonu deyil. Ümid edirik ki, isveçrəli əfsanə bundan sonra da hansısa statustda tennis dünyasında qalacaq, bu oyunun inkişafına və gözəlləşməsinə töhfə verəcək.

Reaksiyalar

Rafael Nadal: “Rocer, əziz dostum və rəqibim. Ümid edirdim ki, bu gün heç vaxt olmayacaq. Şəxsən mən, eləcə də bütün tennis dünyası üçün kədərli gündü. Bütün bu illər ərzində səninlə kortda və ondan kənarda çoxlu maraqlı məqam yaşamaq mənim üçün məmnunluq, şərəf və imtiyaz idi”.

Lionel Messi: “Dahi, tennis tarixinin yeganəsi və istənilən idmançı üçün nümunə. Yeni mərhələdə hər şeyin ən yaxşısını arzulayıram, kortda yeriniz görünəcək. Bizə çoxlu gözəl an bəxş etmisiz”.