Adetokunbo Karrini ən güclü sayır
“Miluoki”nin forvardı Yannis Adetokunbo Stefen Karrini dünyanın ən yaxşı basketbolçusu saydığını etiraf edib.
“Eurohoops” 27 yaşlı yunan ulduzun aşağıdakı fikirlərinə yer verib:
“Mən dünyada ən yaxşı oyunçulardan biriyəm? Komandama qələbə yolunda yardım etməyə qadir yetkin idmançıyam? Bəli. Ancaq məgər dünyanın ən yaxşısıyam? Yox. Hesab edirəm ki, dünyanın ən yaxşı oyunçusu sona qədər ayaqüstə qalandı. O, komandasına finala çıxmaqda və finalda da qalib gəlməkdə yardım edən adamdı. İki il əvvəl biz bunu bacaranda çarpayıma uzanaraq düşünürdüm ki, bəlkə də mən dünyanın ən yaxşı oyunçusuyam. Anlayırsızmı? Ancaq indi yox. Hesab edirəm ki, dünyanın ən yaxşı oyunçusu Stef Karridi”.
İş ondadı ki, ESPN ekspertləri sentyabrın 23-də səsvermə yolu ilə MBA oyunçuları üçün reytinq müəyyənləşdirib. Siyahıya məhz Adetokunbo başçılıq edib. 2-ci yeri “Denver”dən Nikola Yokiç, 3-cü yeri isə “Dallas”dan Luka Donçiç tutub.
Bu arada “Leykers”in forvardı Lebron Ceyms klubun bütün dövrlər üçün ən yaxşı oyunçularının rəmzi “5-liy”ini tərtib edib:
“Mecik Consonu oyun qurucusu, Cerri Uesti hücumameyilli müdafiəçi mövqeyinə qoyuram. Kobi Brayant 3, mən 4, Şakil O”Nil 5 nömrə olacaq”.
Maraqlıdı ki, Lebron “top-5”ə əfsanəvi mərkəz oyunçusu Kərim Əbdül-Cabbarı salmayıb:
“Bu haqda heç nə deyə bilmərəm, ancaq Şak dominantdı. Bizə böyük adam lazımdı, bu üzdən mən varam. Entoni Devis “top-5”də yoxdu? Yaxşı, onu salın, məni çıxarın”.
