“Qarabağ” rəhbərliyi transferlərə nə qədər pul ayırıb?
UEFA-dan “Qarabağ”a bu mövsüm 10 milyon avrodan çox pul gəldi.
Bu maliyyə Çempionlar Liqasında pley-off mərhələsinə vəsiqə qazanıldığı və Avropa Liqasının qrupunda iştirak üçün verildi. Bir çox azarkeşlər deyir ki, rəhbərlik bu pulu transferlərə xərcləmir. Həqiqətən belədi? Bu məsələyə tanınmış menecer Tural Əsgərov “Futbol+” qəzetinə müsahibəsində aydınlıq gətirib:"Baxın, rəhbərlik yetərincə pul ayırmışdı. Bu gün “Qarabağ”da çıxış edən futbolçuların transferindən və maaşından daha çox pul ayrılmışdı. Təbii ki, burda 3-5 milyon nəzərdə tutulursa, bu məbləğ ayrılmamışdı. Həmin transferləri “Frayburq”, “Nant” və “Olimpiakos” kimi klublar edir. “Qalatasaray”, “Fənərbaxça” kimi oyunçuya illik 1-5 milyon verilməyəcəkdi. “Qarabağ” bu günə kimi heç vaxt belə pullar ayırmayıb. Bundan sonra da belə şey olmayacaq. Məndən bunun səbəbini soruşursuzsa, əcəb edir. Çünki bu tam başqa səviyyədi. Bunun üçün Azərbaycan çempionatında iştirak etmək lazım deyil. Çünki bu, qlobal mövzudu. Lakin transferlərə yetərincə pul ayrılmışdı. Büdcədən heç kim heç nə kəsməyib. Hətta son anlar olduğu üçün normalda xərclənəndən çox maliyyə ayrılmışdı. Məsələn, mənim danışıq apardığım futbolçu var idi. Onun çıxış etdiyi çempionatın səviyyəsinə uyğun “transfermarkt”da qiymət qoyulmuşdu. Baxırsan ki, qiyməti 300-400 mindi. “Qarabağ” həmin futbolçuya daha artığını verməyə hazır idi. Amma klub satmayanda satmır. O başqa məsələ ki, futbolçunun qiymətinin bu olmadığını bilirəm. Bəzən məndən elə futbolçulara görə 1 milyon avro istəyirlər… Bunu ödəmək düzgün deyil. Belə səhvə də yol vermək olmaz. Bunlar qəliz məsələlərdi. Bu gün Portuqaliyanın 2-ci divizionundan futbolçu transfer etmək üçün 500 min ödəsəm, sabah superliqada çıxış edən komandanın oyunçusunu transfer etmək istəyəndə deyəcəklər ki, aşağı liqada oyunçuya bu qədər pul veriblər. Onda deyəcəklər ki, mənə 3 milyon ödəməlisən. Sonra deyəcəklər ki, bu komandanın pulu var, bunlar fikirləşmədən pulu sağa-sola səpirlər. Mən niyə oyunçumu 300-500 minə satmalıyam? Bu məsələdə ifrata varmaq lazım deyil ki, mənim pulum var. Onu ancaq bizim tarixə qovuşmuş klublar - “Xəzər Lənkəran”la “Bakı” edirdi. Qiyməti 5 manat olan mala 50 manat verirdilər. Sonra görürdün ki, 50 manat alan 5 manatlıq futbolçudan fərqlənmir. İctimaiyyətdə belə söhbətlər var ki, filankəslər simiclik etdi, pul xərcləmədi. Siz, mən “Qarabağ”ın uğurunu nə qədər istəyiriksə, rəhbərlik bundan iki dəfə artıq arzulayır. Bu səbəbdən də belə söhbətlərə ehtiyac yoxdu. “Qarabağ” UEFA-dan gələn pullarla milyonçu olur? Bəlkə də ancaq bu il rəhbərlik öz xərclərini qarşılaya bildi. Bu, düzgün yanaşma deyil. Mən camaatı başa düşürəm. Yazılan şərhlərin çoxu “Qarabağ”ı istədiklərindəndi. Amma ədalətli deyil. Düzdü, mən “Qarabağ”ın bütün işləri haqda danışa bilmərəm. Amma danışıq apardığım iki futbolçu üçün ayrılan məbləğ yetərincə yüksək idi".
İLKİN SULTANLI
Digər xəbərlər
