Tanınmış menecer "Qarabağ"ın transfer edə bilməməsində günahı özündə gördü
"İki oyunçu ilə danışıqları mən aparmışam, amma alınmayıb. Burda bir pay günah da mənimdi. Buna günah da demək olmaz. Bu işlər belədi. Elə oyunçular var ki, hava limanında yatırlar ki, mən onlara “Qarabağ”la bağlı xəbər verim. Bəzi növbədə duran klublar da var. Onlar can atırlar ki, futbolçularına görə mən onlarla danışıq aparım. “Gəl” desəm, qaça-qaça gələcəklər. Seçimi bu futbolçular arasından etsək, problem olmaz. O zaman hansısa oyunçunun alınmamaq söhbəti olmayacaq. Amma gəlin düşünək. Həmin futbolçu “Qarabağ”a nə qədər xeyir verəcək? Bir aydan sonra mətbuat, ictimaiyyət deyəcək ki, bu nə transferdi? Bunu kim gətirib bura? Nə üçün bu qədər pul xərclənib? Bax, bu suallara hazır olmaq lazımdı".
Bu sözləri "Futbol+"ə açıqlamasında tanınmış menecer Tural Əsgərov deyib. Agent "Qarabağ"ın "transfer pəncərəsi"nin son günlərində heyətini gücləndirə bilməməsinin səbəbindən danışıb:
"Elə oyunçular da var ki, “Qarabağ”a həqiqətən xeyir verir. Onlar arasında seçim aparanda bəzi hallarda transferlər baş tutmur. Elə futbolçular var ki, onların klublarını da razı salmalısan. Danışıq apardığım bir oyunçu var idi. Klubu son günə kimi dedi ki, özümüz oyunçu götürüb, bunu satırıq. Son anda zəng etdilər ki, alınmadı. Üzrxahlıq edib, sata bilməyəcəklərini dedilər. Belə şeylər həqiqətən çox olur. Amma heyətdə hansısa problem olsaydı, Qurban müəllim mütləq kimisə götürərdi. Bu gün kimi gəldi komandaya cəlb etməyə ehtiyac yoxdu. Ola bilər ki, Vacidən sonra ehtiyat oyunçular skamyası bir az qısaldı. Ola bilsin, ictimaiyyət düşünür ki, Avropa Liqasının qrupunda mübarizə aparmaq çətin olacaq. Amma bütün heyəti dəyişmək mümkün deyil. İndi soruşsam, hamı deyəcək ki, qrupda ilk iki pillədə qərarlaşmaq üçün “Qarabağ”ın ən azı 5-6 yeni futbolçuya ehtiyacı var. Ancaq klub hesab edir ki, bu heyətlə də mübarizə aparmaq olar. Kimsə qrup qalibi olmağa əminlik tələb edirsə, belə bir heyət yoxdu. “Frayburq”un “transfermarkt”da dəyəri 150 milyon avrodu. Bu ona əsas verir ki, qrupda 1-ci yeri tutacaqlar? “Olimpiakos” Marselonu transfer etdi. Bu o deməkdi ki, yunanlar ilk sırada yer alacaq? Pireylilərin oyununa baxın! Təsnifat mərhələsində bir qələbəsi belə yoxdu. Bir-iki transfer nəyəsə təminat versəydi, bütün məşqçilər bunu edərdi".
Digər xəbərlər
