Növbəti mövsümdən premyer-liqada çıxış edəcək "Kəpəz" heyətini təcrübəli futbolçularla zənginləşdirir. Onlardan biri də 33 yaşlı Rauf Əliyevdi. Millimizin sabiq üzvü ilə "Kəpəz"i seçməsi, qarşıdakı mövsümlə bağlı hədəfləri və başqa mövzularla bağlı danışdıq.
- Rauf, necə oldu ki, "Kəpəz"də oynamaq qərarına gəldin?
- Çempionat bitəndən sonra "Kəpəz"dən mənimlə əlaqə saxladılar. Xeyli düşünəndən sonra karyeramı Gəncə təmsilçisində davam etdirmək qərarı verdim. Artıq iki həftədi komandadayam və iki yoxlama matçında da iştirak etmişəm. Qarşıda görüləcək çox işimiz var. Bəlli plan üzrə hazırlığı davam etdiririk. Düşünürəm ki, hər şey qaydasında olacaq.
- Başqa təkliflər yox idi?
- Rəsmi təkliflər olmadı, ancaq söz-söhbət idi. Yalnız məşqçiliyə başlamaqla bağlı təklif gəlmişdi ki, bunu da qəbul etmədim. Çünki hələ 33 yaşım var, gücüm çatır, oynamaq istəyirəm.
- Şans yaransa, yenidən legioner həyatı yaşamağı düşünürsən?
- Açığı, bu yaşda ölkə xaricində çıxış etmək çox çətindi. Ona görə də bu haqda düşünmürəm. Hazırda ancaq "Kəpəz"dəki çıxışıma fokuslanmışam.
- "Kəpəz"də təcrübəli futbolçular çoxdu. Seçiminə bu nüans da təsir göstərdi?
- Bəli, heyətdə Tural Axundov, Əfran İsmayılov, Elvin Yunuszadə kimi təcrübəli futbolçular yer alır. Amma sırf buna görə "Kəpəz"i seçməmişəm. Komanda yenidən formalaşır. Əsas məqsədim çox oynamaq və özümü yaxşı tərəfdən göstərməkdi. Məhz buna görə "Kəpəz"dəyəm.
- Əfran İsmayılov açıqlamasında dedi ki, Raufa görə "Kəpəz"ə gəldim. O, hardadısa, mən də ordayam. Həqiqətən belədi?
- (gülür) Əfranla uzun müddət bir neçə klubda birgə çıxış etmişik. Həmişə klubunu dəyişəndə bu sözü deyir. Təbii ki, zarafat edir.
- Qarşıdakı mövsümdə "Kəpəz"dən nə gözləyək?
- Hər bir komanda maksimum irəli gedərək titul qazanmaq istəyir. "Kəpəz" 4 ildən sonra yenidən güclülər dəstəsinə qayıtdı. Komandamız yenidən formalaşır. Əsas məqsədimiz ənənəsiylə Azərbaycan futbolunda iz qoyan Gəncədə futbolu yenidən dirçəltməkdi. Azərbaycan çempionatları tarixində stadionları dolduran gəncəli azarkeşlərin yenidən tribunalara axın etməsinə təkan verməliyik. “12-ci oyunçu” amili çox böyükdü. Ona görə "Kəpəz" azarkeşlərinin rəğbətini qazanmaq istəyirik. Bunu çempionatda sərgiləyəcəyimiz oyunla göstərməyə çalışacağıq.
- Yetirməsi olduğun "Qarabağ" İsveçrə çempionu “Sürix”i 3:2 hesabı ilə məğlub etdi. Səncə, "köhlən atlar" Çempionlar Liqasının qrupuna düşə biləcək?
- "Qarabağ"ın uğuru xalqımızı sevindirir. Mən də klubun yetirmısi olaraq onların hər uğuruna çox sevinirəm. Ağdam təmsilçisi həmişə güclü rəqiblərlə qarşılaşıb, dəfələrlə də onları məlub edərək mərhələlər keçməyi, qrupa düşməyi bacarıb. Bunu bacarıbsa, deməli, cari mövsümdə Çempionlar Liqasında uğurla irəliləyib, qrupa düşəcək. Mən buna inanıram. "Sürix"lə səfər matçında da "Qarabağ"a uğurlar arzu edirəm.
ABDULLA İSMAYILOĞLU