Konfrans Liqasının oyunlarından sonra UEFA-nın reytinq cədvəlində dəyişikliklər olub. Azərbaycan klublarının 3-ü - “Neftçi”, “Zirə” və “Qəbələ”nin uduzması sıralamadakı mövqeyimizə təsir edib. Ölkəmiz 3 pillə geriləyib. Ötən mövsümün sonunda 26-cı olan Azərbaycan hazırda 29-cudu. Hesabımızda isə 13,125 əmsal var. Avrokubokların 2-ci təsnifat mərhələsinin cavab görüşlərindən sonra Azərbaycanın sıralamada yerinin dəyişəcəyi gözlənilmir. Çünki ölkəmizdən 1 pillə öndə olan Polşanın hesabında 14,750 əmsal var. Bizdən geridə olan Sloveniya və Qazaxıstan isə 11,875 əmsala malikdi. Onların da cavab görüşlərindən sonra bizi keçməsi mümkün olmayacaq. Maraq üçün qeyd edək ki, klublarımız cari mövsümdə hesablarına 0,500 əmsal yazdırıb. Bu da ancaq “Qarabağ”ın sayəsində mümkün olunub. Ağdam təmsilçisinin Çempionlar Liqasının 1-ci təsnifat mərhələsinin cavab matçında “Lex”i 5:1, 2-ci raundun ilk görüşündə “Sürix”i 3:2 hesabı ilə məğlub etməsi bunu şərtləndirib.
Qeyd edək ki, ilk pillədə 88,885 əmsalla İngiltərə qərarlaşıb.