"Beşiktaş''ın baş məşqçisi Valerien İsmael Almaniyanın ''Bild'' nəşrinə diqqətçəkən açıqlamalar verib.

46 yaşlı fransalı mütəxəssis ''Beşiktaş''da yaşadıqlarından danışaraq bu komandanı ''Bavariya'' ilə müqayisə edib: ''Düzünü desəm, Türkiyədə çalışmaq planım yox idi. ''Vest Bromviç''dən ayrılandan sonra İngiltərədə qalacağımı düşünürdüm. Amma mənə Türkiyənin elə bir klubundan təklif gəldi ki, dərhal diqqətimi cəlb etdi. ''Beşiktaş'' böyük bir meydan oxuma və böyük bir mübarizə deməkdi. Burda keçirdiyim bir neçə ay ərzində bunu çox gözəl hiss etdim. Uzun illər Münhendə saçımı kəsdirdiyim bir bərbər var. Futboldan anlayışı yoxdu. Həmişə görüşəndə ailəmiz və uşaqlarımız haqda danışırdıq. Amma məlum oldu ki, həyat yoldaşının qardaşı və öz qardaşı ''Beşiktaş'' fanatı imiş. Mən ''Beşiktaş''ın başına keçdikdən sonra məni dəstəkləməyə başladı. Yəni ''Beşiktaş'' sevgisi sərhəd tanımır. Ötən mövsüm öz meydanımızda ''Fənərbaxça'' ilə 1:1 bitən bir derbimiz oldu. 28 ildi futbolun içində olsam da, o cür atmosferi, adrenalini daha öncə heç yerdə yaşamamışdım. Bunu anlatmaq mümkün deyil. Bunu yaşamaq lazımdı.

Fanatlarımızın stadiondakı fit sədaları böyük bir gurultu yaradır. Bu, əlavə üstünlükdü. Çünki rəqib və hakim böyük təzyiq altına düşür. Hətta bir dəfə məşqimizə 12 min azarkeş gəlmişdi. Orda da gurultu o qədər böyük idi ki, oyunçularla bir-birimizi eşitmirdik. Həmin andan etibarən əl işarələrindən daha çox istifadə etməyə başladım. ''Beşiktaş'' bütün dünyada 20 milyon azarkeşi olan klubdu. Hədəfi də daim çempionluqdu. Bu baxımdan ''Bavariya'' ilə müqayisə aparmaq olar. ''Bavariya''nın Almaniyada hədəfləri nədisə, ''Beşiktaş''ın da hədəfləri eynidi. Digər paralellərə gəlincə, ''Beşiktaş''da da hər şey çox yüksək səviyyədə təşkil olunub. Toplanışların və səyahətlərin təşkilinə söz ola bilməz. Məşq etdiyimiz sahəni beşulduzlu bir tətil bölgəsi də adlandırmaq olar. Buranın nəinki futbolçusu, hətta ən sadə işçisi də burda çalışdığı üçün qürur duyur və əlindən gələni edir. Eynilə ''Bavariya''da olduğu kimi. Daha bir bənzərlik odu ki, çempionatda hər komanda bizə qarşı ikiqat güclə oynamağa çalışır. Cenk Tosun alman, ingilis dillərini bilən, premyer-liqa təcrübəsi olan və bu klubu ürəkdən sevən futbolçudu. Fiziki cəhətdən yaxşı formadadı və rəqibin cərimə meydançasında nə etmək lazım olduğunu gözəl bilir. Onun gəlişi bizim üçün çox yaxşı oldu. Veqhorst da çətin anlarda fərq yarada bilən forvarddı. Bizə məhz belə oyunçular lazımdı. Özümə örnək seçdiyim məşqçilər Dieqo Simeone ilə Antonio Kontedi. Mənim fəlsəfəm həmişə pressinqdi. Kənarda sakit durub matçın axarını seyr etmək mənlik deyil. Matçı yaşamalı və oyunçuların enerjisini yüksəltməliyəm. Xüsusilə də bir problem olanda və oyunçularda şübhə yarananda bunu mütləq etməliyəm''.