''Lill''də iki mövsüm keçirdikdən sonra Fransa karyerasını başa vuran və azad agent statusunda türkiyəli iş adamı İşıtan Günün sahibi olduğu Niderland təmsilçisi ''Fortuna'' ilə beşillik müqavilə imzalayan Burak Yılmaz yeni klubunda ilk dəfə mətbuat önünə çıxıb.

Dünən 37 yaşı tamam olan təcrübəli forvard ''Fortuna''nı seçməsi və başqa məqamlar haqda danışıb: ''Əslində təklif çox idi. Amma bu klubda sevdiyim insanlar var. Həm də ''Fortuna'' məni və gələcəyimi düşünən bir layihə təklif etdi. İki il futbolçu, üç il məşqçi kimi kluba xidmət edəcəm. Bu layihə mənə çox maraqlı gəldi. Hələ ki yalnız oyunçu kimi kluba fayda verməyə köklənmişəm. Yəni çoxlu qol vurmaq və faydalı olmaq istəyirəm. Buna qədər olan ''Fortuna'' ilə bundan sonrakı ''Fortuna'' arasında ciddi fərq olacaq. Bu komandanı birlikdə böyüdəcəyik. Amma hədəfə pillə-pillə çatmağa çalışacağıq. Buranı nə üçün seçdiyimi hamıya göstərəcəm! Stadionu gəzəndə tribunaların meydana çox yaxın olduğunu gördüm. Yeni mövsümdə bu stadion rəqiblər üçün ciddi problemə çevriləcək. Bir məqama da aydınlıq gətirmək istəyirəm. İki il tamam olduqdan sonra məşqçi də, idman direktoru da, yönətici də ola bilərəm. Konkret qərar verməmişik. Klub rəhbərliyi, sadəcə, mənim təcrübəmdən yararlanmaq istəyir. Kim bilir, bəlkə iki mövsümdən sonra yenə karyeramı davam etdirdim! Yaşayıb görəcəyik. Bu qərarımla karyeramda geriyə addım atdığımı iddia edənlərlə razı deyiləm. ''Lill''ə yollananda da belə söz-söhbət var idi. Ama PSJ-ni qabaqlayıb çempion olduq. Bunu, sadəcə, bir örnək kimi göstərdim. Səviyyəmizi və potensialımızı bilərək yavaş-yavaş böyüyən bir klub olmaq istəyirik. ''Fortuna''nın tarixinə nəzər salanda burda bir çox önəmli futbolçunun çıxış etdiyini gördüm. Ayağını yorğanına görə uzadan, amma dəyərlərinə sahib çıxan bir klubdu. ''Fortuna'' son illərdə öz səviyyəsindəki klubları xeyli üstələməyi bacarıb.

Mən də komandanın inkişafına yardım etmək istəyirəm. Sneyder başda olmaqla bir çox niderlandlı dostum var. Onlar da bu seçimimi sevinclə qarşıladılar.

"Fortuna''nın ölkənin köklü klublarından olduğunu dedilər. Ötən mövsüm bütün turnirlərdə 50-yə yaxın oyun keçirdim. 37 yaşım var.

Fizioterapevtim və həkimim mənə tətildə heç nə etməməyi və yaxşıca dincəlməyi məsləhət gördü. Bu üzdən hələ ki fiziki cəhətdən yeni mövsümə hazır deyiləm''.