Azərbaycan klublarına avrokuboklarda ən tərsgələn rəqiblər Polşa komandalarıdı.

Yalnız "Qarabağ" onlara qənim kəsilib. 2010-cu ildə "Visla" üzərində başlayan zəfər 2020-də "Legiya"nın darmadağınına qədər davam etdi. Klublarımıza qənim kəsilən, həmçinin "köhlən atlar"ın uğurlu seriyasını diqqətlə təhlil edən "Lex" həm qapazaltı olmamaq, həm də bu vaxta qədər məğlub olan yerlilərinin qisasını almalıydı.

"Kikboksçu" filmində Kort ilə Ziyan arasında maraqlı dialoq var. Ziyan qisas eşqi ilə yanan amerikalıya deyir: "Qisas həm çox təhlükəli, həm də güclü yanaşmadı".
Polşalılar təhlükəyə məruz qalmadan qisas almalıydılar ki, bunu da bacardılar. Meydan sahibləri ehtiyatlı oynayaraq "Qarabağ"a ərazi üstülüyü verib, maksimum az güc sərf etməklə qisas aldı. Ağasəlim Mircavadov demişkən, "Lex" bizə böyük təhlükə yaratmadı, sadəcə, şansını gözlədi və dəyərləndirdi. Oyun planında üstün olan

"Qarabağ"ın minimalhesablı məğlubiyyəti Azərbaycanı silkələdi desək, yanılmarıq.

Söz yox ki, Patrik Andradenin gedişi "köhlən atlar"ın oyun "ansambl"ını pozub. Afrikalı həm mərkəzdə hücumların qurulması, həm top saxlamaq, həm də dağıdıcı oyunu ilə komandaya çox fayda verirdi. Onun meydanda olması Qara Qarayevin üzərinə daha az təzyiqin düşməsi, Kadi ilə Ozobiçin hücuma daha da rəngarənglik qatması demək idi. Odu ki, klub "6 nömrə"yə layiqli əvəzləyici tapmasa, həmin mövqedəki boşluq daha da qabaracaq.

Poznandakı oyunda Kadi, Leandro Andrade, Vaci onlarda gözlənilən oyunu sərgiləyə bilmədi.

Cavab matçında start heyətində Ramil Şeydayevin yer alması daha məntiqlidi. Millimizin futbolçusu taran tipli hücumçudu. Həm fiziki gücü sona qədər mübarizə aparmağa imkan verir, həm də meydanın istənilən sahəsində döyüşə bilir. Həmçinin rəqib futbolçuların əksəriyyəti ucaboy olduğundan, cüssəli Ramilin meydanda olması vacibdi. Odu ki, Ramili ya Vacinin əvəzinə start heyətində yer verməklə nominal hücumçu, ya da Leandro Andradenin əvəzinə meydanda olmaqla Vacinin arxasında oynatmaq mümkündü.

Həmçinin Riçard Almeydanın yerinə Filip Ozobiçə ilk dəqiqələrdən şans verilsə, daha faydalı olar. Xorvatiyalı yaradıcılığı ilə yanaşı, top saxlamağı, standart vəziyyətlərdən fərqlənməyi də yaxşı bacarır.
Cavab matçında "Qarabağ"ın hücum futbolu sərgiləyərək, ilk dəqiqələrdən qol axtarışında olacağını nəzər alsaq, rəqibi daha çox qapanacaq, böyük ehtimalla sərt oyuna, qayda pozuntularına yol veriləcək. Odu ki, Qurban Qurbanov standart vəziyyətlər üzərində işləyərək, ondan maksimum faydalanmalıdı.
Cinahlardan keçidləriylə diqqəti çəkən Marko Veşoviçlə Elvin Cəfərquliyev sürətə daha çox güc verməlidi, nəinki fərdi oyuna. "44 nömrə" topu müdafiəçilərdən qəbul edərək maksimum irəli daşımaqla Zubiri dəqiq ötürmələrlə təmin etməli, serbiyalı isə cinahlardan reydlər etməklə cərimə meydançasına asmalar etməldi.

Ən əsası "Qarabağ" qapısını toxunulmaz saxlamaq şərtiylə ilk 15 dəqiqədə hesabı açmalıdı. Məşqçilər heyəti komandanı buna kökləməlidi. Əks halda "köhlən atlar"ın işi çox çətin olacaq. Nəticədə "Lex" yalnız cütün qalibi kimi mərhələ keçməyəcək, həm də "Qarabağ"ın bir-bir məyus edib avrokuboklardan kənarlaşdırdığı "Visla", "Pyast" və "Legiya"nın qisasını alacaq.

ABDULLA İSMAYILOĞLU