Belarusla oyunun icmalına baxarkən bir məqam diqqətimi çəkdi.

Qolu vurandan sonra formasını çıxaran və buna görə sarı vərəqə alan Mahir Emrelinin soyadının altında “misses next match” qeydi göründü. İndi belə çıxır ki, 1 qol, 1 məhsuldar ötürmə ilə qəhrəman olan Mahir həm də antiqəhrəmandı. Yığmanın əsas qol ümidlərindən biri sentyabrın 22-də keçiriləcək Slovakiya ilə çətin səfər oyununu buraxacaq. Millətlər Liqasında iki sarı vərəqəyə görə cəzalı duruma düşürsən. Gəlin, görək Mahir ilk vərəqəni nə zaman alıb? Cəmi 3 gün əvvəl Bakıda, “Dalğa Arena”da keçirilən Azərbaycan – Slovakiya matçının 90+6-cı dəqiqəsində referi hücumçunu cəzalandırıb. Mahir o qədər yaddaşsızdı ki, 3 gün əvvəl aldığı vərəqəni unudub? Qol sevincinə görə formanı çıxarmaq belə vacib idi? Bəlkə dünya çempionatının final görüşü imiş, xəbərimiz yoxdu! Axı qarşıda elə həmin Slovakiya ilə səfər görüşü var. Nə qədər intizamlı və ya intizamsız olsan da, bu komandanın sənə ehtiyacı var. Bir sözlə, adam hisslərinə yenik düşdü. Uzun müddətdi yığmada qol vura bilməməyin sevincini artıqlamasıyla yaşayıb, növbəti oyun üçün özünə istirahət götürdü. Nə bilim, vallah! Belə bir misal var: zirvəyə çıxmaq asandı. Əsas odu ki, ordan bir küləklə təpəsi üstə yerə gəlməyəsən. Mahir zirvədə qalmağın onun üçün çox çətin olduğunu bir daha göstərdi!

İLKİN SULTANLI