Azərbaycan millisinin tarixində bəlkə də bir ilk yaşanırdı.

Yığma 11 gün ərzində ardıcıl 4-cü rəsmi matçına çıxmışdı. Millətlər Liqasında işlər yaxşı getməsə də, azarkeşlər yenə komandanı tək buraxmamışdı. Şəhərdən uzaq "Dalğa Arena"ya təxminən 3 minə yaxın fanat gəlmişdi. Amma onların simasında əvvəlki həvəs yox idi. Qazaxıstanın Slovakiyanı məğlub etməsi adamlarda bir az da məyusluq yaratmışdı. Tamaşaçıların sayı az olsa da, komandaya dəstək verirdilər. Arenada əsl premyer-liqa ab-havası var idi. Sanki "Neftçi" "Dalğa Arena"da "Səbail"i qəbul edirdi...

İlk 20 dəqiqədə topa nəzarət edirdik. Hiss olunurdu ki, bu rəqibi yenmək olar. Düzdü, ara-sıra qonaqlar tribunalara toplaşanlara həyəcanlı anlar yaşadırdı. Lakin hər şey müdafiəçilərimizin nəzarətində idi. Fasiləyə kimi ən maraqlı hadisələr tribunalarda yaşanırdı desək, yanılmarıq. Simfonik orkestrin ifa etdiyi musiqilər azarkeşləri coşdururdu. Fanatlar bəzən məşq edən futbolçuların adını səsləndirir, onlara dəstək olurdu. Beləliklə, cansıxıcı ilk yarı başa çatdı.

Maraqlı hadisələrin çoxu 2-ci yarıda baş verdi. Tribunalar futbolçulardan qol tələb edir, De Byazi isə yerində dura bilmirdi. Komandanın istəkli oyunu kapitan Maksimi də cuşa gətirirdi. Millinin və "Qarabağ"ın kapitanı Kamran Ağayevlə birgə idarəçiliyi əla almışdı. Onlar sanki millinin baş məşqçisi və köməkçi məşqçi idi. Çoxdilli Maksim meydanda olan futbolçulardan problemləri soruşur, Kamran isə öz tərzində müdafiədə yer alan yerli futbolçuları "diri" oynamağa səsləyirdi. Onların işbirliyi yığmaya fayda verdi. Hər iki şəxs Ramillə Mahirə tez-tez yerdəyişmə etməyi tapşırırdı. "Dinamo"nun ulduzunun möhtəşəm qolundan sonra stadion sevincə qərq oldu. Hücumçu qol sevincini dövrə vuraraq qeyd edəndən sonra Maksimlə Kamranı xüsusi təbrik etdi. De Byaziyə isə yaxın getmədi.

Qoldan sonra komandamız müdafiəyə “oturdu”. Bəzi səhvlər De Byazinin əsəblərinə toxunurdu. O, fikirlərini Maksimə bildirir, kapitan isə futbolçuları ayıltmağa çalışırdı. İtaliyalı ancaq Mahirə tapşırıqlar verirdi. Onun pressinq etməsini istəyirdi. Məhz bu gediş yaradı. O, müdafiəçiyə basqı edərək topu ələ keçirdi. Sonda dəqiq zərbə endirən Şeydayev yekun nəticəni müəyyənləşdirdi.

Stadionda möhtəşəm qələbəlik var idi. Hakimin final fitindən sonra De Byazi bir-bir oyunçuları təbrik etdi. Mahiri qucaqlamağı da özünə borc bildi. Qələbədən həzz alan azarkeşlərdən biri meydana çıxdı. Əsgərlər onun arxasınca düşsələr də, yaxalaya bilmədilər. Şahruddinin yanına gələn fanat onunla şəkil çəkdirdi. Hə, nəhayət, yığmamız qələbə qazandı. Göydən 3 alma düşdü… Almalarımızın yox, xalımızın sayı çox olsun!

İLKİN SULTANLI