İtaliyanın Lombardiya vilayətinin inzibati mərkəzi, belə desək, artıq bir neçə gündü qırmızı və qara rənglərə boyanıb.

"Football-plus.az" xəbər verir ki, Milan şəhərinin eyniadlı klubunun azarkeşləri mayın 22-dən şadyanalıq edirlər. Axı onların sevimli komandası 11 illik həsrətə son qoymaqla çempion olub!

A seriyasında yenicə sona çatan mövsüm ən böyük titul uğrunda mübarizə baxımından olduqca maraqlı keçdi. Bircə əsas suala son turda cavab tapıldığını qeyd etmək kifayətdi. “İnter” çempion titulunu qorumağa yaxın idi. Hər halda, 34-cü turdan sonra çempionatın potensial lideri sayılırdı. Bunu real liderliyə çevirmək üçün “Bolonya”ya qalib gəlmək tələb olunurdu. Lakin Simone İnzaqinin komandası aprelin 27-də 20-ci turdan təxirə salınan oyunda uduzmaqla (1:2) növbəti çempionluq yolunda ağır zərbə aldı. Bir andaca vahid liderliyi rəsmiləşən “Milan” mövsümün son 6 oyununda qələbələri sıraladı və sonda azakeşlərini sevinc göz yaşlarına qərq etdi!..

Uzun illərdən sonra skudetto həsrətini torpağa basdıran “qırmızı-qaralar”ın uğuru İtaliyanın 2-ci ən titullu klubu üçün çox dəyərlidi. Son illər keçid dövrünü yaşayan “Milan”, bir az pis çıxmasın, az qala hamını özünə güldürməklə məşğul idi. Rəhbərliyin sıralanan uğursuzluqlardan sonra güclü, parlaq nəsə qurmaq üçün atdığı addımların heç bir nəticə verməməsi yerli tifozini və komandanın dünyanın dörd bir yanında yaşayan milyonlarla azarkeşi həm qəm dəryasına batırmış, həm də bosslara qarşı qəzəbləndirmişdi. Nəhayət, 2020/21 mövsümündə yaxın gələcəyin uğur qazanacaq komandasının təməli qoyuldu: “Milan” Stefano Pyolinin başçılığı altında A seriyasında əzəli rəqibi “İnter”dən sonra 2-ci yeri tutaraq uzun fasilədən sonra Çempionlar Liqasına vəsiqə qazandı. Məhz onda klubda və tifozidə növbəti mövsüm üçün daha böyük uğura inam və ümid yaranmışdı.

Zarafat deyil, azarkeşlər sonuncu çempionluğu 2011-ci ildə bayram etmişdilər. Həmin uğuru tam başqa komanda qazanmışdı. Hərçənd 11 il əvvəlki “Milan”da da Zlatan İbrahimoviç “meydan sulayırdı”. Təcrübəli hücumçu ötən illər ərzində PSJ, “Mançester Yunayted” və “Los Anceles Qalaksi”nin formasında parlaq oyunu fonunda bombardirlik keyfiyyətini nümayiş etdirmiş və titullar kolleksiyasını artırmışdı. Amma 2020-ci ildə “Milan”a qayıdarkən çoxları ondan ciddi nəsə gözləmirdi. 40 yaşlı futbolçunun son mövsümdə zədə sindromuna görə arabir meydanda görünməsi də “ağzıgöyçəklər”in onunla bağlı fikrini möhkəmləndirmişdi. Amma bu bir həqiqətdi ki, komandanın yeganə ulduzu məhz Zlatan idi. Ambisiyaları yerə-göyə sığmayan nəhəng cüssəli oyunçu gənc oyundaşlarına yaşıl meydanda lazımi qədər dəstək verə bilməsə də, ondan kənarda, məşqdə və paltardəyişmə otağında psixoloji müdaxilələri ilə çox faydalı ola bilirdi.

Ümumiyyətlə, “Milan”ın çox gecikən uğurunda təcrübəli məşqçinin rəhbərliyi altında kollektiv şəkildə görülən işin effekti daha qabarıq görünür. Hər bir oyunçu lazımi məqamda ortaya çıxaraq məsuliyyət yükünü üzərinə götürməyi bacarır. İbrahimoviç baş məşqçi ilə birlikdə komandanı kənardan ilhamlandırmaq bacarığından başqa meydana çıxdığı 23 oyunda 8 qol və 3 məhsuldar ötürmə ilə də faydalı oldu. Kritik məqamlarda Rafael Leau, Teo Ernandes, Frank Kessi, Ante Rebiç və Olivye Jiru da sözünü dedi. Ötən yay Canluici Donnarummanı sıralarında saxlaya bilməyən klubun “Lill”dən Mayk Menyanı transfer etməsi artıq bu əməliyyatın uğurlu nəticə verdiyini deməyə əsas verir. Fransalı qapıçı mövsümboyu sələfi ilə müqayisədə daha effektli göstəricilərlə yadda qaldı. Yeni komandanın oyun və emosional strukturuna əla uyğunlaşan Mayk mövsümün həlledici hissəsində arxa xəttin inamlı oynamasında böyük rola sahib oldu.



“İnter”lə müqayisədə “Milan” mövsüm ərzində ciddi böhran yaşamadı. Bu mənada yalnız ötən il noyabr və dekabr aylarında keçirdiyi 6 matçda 8 xal qazanmasını xatırlatmaq olar. Əsas odu ki, Pyolinin komandası finişdən əvvəl qələbələri sıraladı və bunun sayəsində Lombardiyanın baş şəhərini qırmızı və qara rənglərə boyadı!

Faktlar
* “Milan” 11 ildən sonra ölkə çempionu oldu. “Qırmızı-qaralar” 2010/11 mövsümündə skudettonu Massimiliano Alleqrinin başçılığı altında qazanmışdılar.
* “Milan” çempionluq sayına görə əzəli rəqibi “İnter”ə (19) çatdı. İtaliyada skudettonu ən çox qazanan komanda isə “Yuventus”du – 36 dəfə.
* “Milan” 2016-cı ildən sonra ilk titulunu qazandı. Komanda həmin il dekabrın 23-də “Yuventus”u penalti seriyasında üstələməklə İtaliya superkubokuna yiyələnmişdi.
* “Milan” İtaliyada qələbəyə görə 3 xal sisteminin tətbiq olunduğu 1994-cü ildən sonra ən gənc heyətə malik çempiondu. Komandanın oyunçularının orta yaş göstəricisi 26 yaş 97 günə bərabərdi.
* Stefano Pyoli karyerasında ilk titulunu qazandı. 56 yaşlı mütəxəssis “Milan”dan əvvəl “Fiorentina”, “İnter”, “Latsio”, “Bolonya”, “Palermo”, “Kyevo”, “Sassuolo”, “Pyaçentsa”, “Qrosseto”, “Parma”, “Modena” və “Salernitana”nı çalışdırıb.
* Zlatan İbrahimoviç 11 ildən sonra “Milan”la ikinci dəfə çempion oldu. Maraqlıdı ki, o, komandanın 2005-ci ildən sonrakı hər iki uğurunda rol oynayıb.
* İbrahimoviç 5-ci dəfə İtaliya çempionu oldu. İsveçli hücumçu “İnter”lə 3 dəfə qızıl medala sahib çıxıb. Amma onun “Yuventus”la qazandığı hər iki çempionluq “Kalçopoli” qalmaqalına görə ləğv edilib.
* İbrahimoviç 12-ci dəfə ölkə çempionu oldu. O, “Ayaks”la 2, “İnter”lə 3, PSJ ilə 4, “Barselona” ilə isə 1 dəfə çempionluq qazanıb.
* İbrahimoviç karyerasında 32-ci titulunu qazandı.
* Daniel Maldini “Milan”la ilk dəfə çempion oldu. Maraqlıdı ki, son mövsümdə A seriyasında 8 oyun keçirib 1 qol vuran 20 yaşlı hücumçunun atası Paolo bu klubla 7, babası Çezare isə 4 dəfə skudettoya sahib çıxıb.
* Mayk Menyan son mövsüm çempionatda iştirak etdiyi 32 matçdan 17-də top buraxmayıb. Qalan oyunlarda isə topu 21 dəfə tordan çıxarıb. Fransalı qapıçı A seriyasında “quru” oyunların sayına görə birinci yeri tutub. Samir Handanoviç (İnter) ilə Ruy Patrisiu (Roma) hərəyə 15 matçda qapısını toxunulmaz saxlayıblar. Menyan bu planda qitənin 5 aparıcı liqalarında 20 “quru” oyun keçirən Alisson (Liverpul) ilə Edersondan (Mançester Siti) və 19 matçda top buraxmayan Aleks Remirodan (Real Sosyedad) geri qalıb.

RAMİL YUSİFOV