Aprelin 17-dən bəri bu ölkədə personası ən çox müzakirə olunan futbolçulardan biri, heç şübhəsiz, Elvin Cəfərquliyevdi.

Bunun əsası var. Axı Çempionlar Liqasında fenomenal oyun göstərən müdafiəçi “Futbol+”in ümummilli sorğusunda 2025-ci ilin ən yaxşı futbolçusu da seçilmişdi. Amma aprelin 17-də Elvinlə Abbas Hüseynovun həyatı dəyişdi: belə ki, “Qarabağ”ın baş məşqçisi Qurban Qurbanov klubdaxili intizam qaydalarını pozan bu iki futbolçunu əvəzedici heyətə göndərdi.

Uzun müddət bu iki futbolçu ilə bağlı sükut qorundu. Nəhayət, bir neçə gün əvvəl maraqlı hadisə baş verdi. Abbasın xidmətinə yenə də ehtiyac duymayan Qurbanov Elvini Avstriya toplanışına yollanan heyətə saldı. Bu qərar indi fərqli dəyərləndirilir. Baş məşqçinin usta futbolçunu bağışladığını düşünənlər də var, “Qarabağ”ın onu formasını yaxşılaşdırandan sonra satacağını güman edənlər də. Hələ ki Avropanın hansısa iddialı klubu Cəfərquliyevə görə Ağdam klubunun “elçi daşının üstündə oturmayıb”. Maraqlıdı, bəs yerli klublardan hansısa belə baha transferə imza ata bilərmi? Yerli klublar Elvini transfer etməyə qadirdisə, onlara nə mane olur?

Bu suallara cavab tapmaq üçün menecer fikrinə ehtiyac duyduq. Əvvəlcə sizi Emil Şükürovun fikirləri ilə tanış edirik: “Sabah”, “Neftçi”, “Turan Tovuz” - bu üç klubun Elvini həm transfer etməyə, həm də müqaviləsinin maddi tələblərini yerinə yetirməyə gücü olduğuna inaniram. Mane olacaq amillər arasinda ilk növbədə oyunçunun xarakteri, ətrafinda kifayət qədər söz-söhbət gəzməsi durur. Mediada fəal şəkildə müzakirə olunan fərddi. Belə müzakirələr heç də həmişə müsbət xarakterli olmur. Bundan başqa, klublar birbaşa rəqiblərindən pul verib futbolçu almağa üstünlük vermirlər. Bir mövsüm gözləyib, sonradan oyunçunu sərbəst transfer etmək istəyirlər. Üçüncü amil oyunçunun öz istəyidi. Daim gündəmdə olan oyunçu xarici klubların da hədəfinə düşəndə bir çox hallarda daha aşağı məbləğə legioner həyatı yaşamağa razılaşa bilər.
Adətən, klub “gözdən çıxardığı” oyunçunu yenidən satmaq məqsədi ilə geri qaytarır. Formada olan oyunçu daha yüksək məbləğ müqabilində transfer edilə bilər”.
Elvin Cəfərquliyevin meneceri Tural Əsgərov: “Onun Avstriyadakı təlim-məşq toplanışında iştirak etməsi başqa kluba transfer edilməsi ehtimalının sıfra yaxın olması demək deyil. İş davam edir. “Transfer pəncərəsi” yenicə açılıb. Elvini heyətə qata biləcək çox klub var”.
Menecerlərdən Vaqif Heydərlinin də bu mövzuda fikrini öyrəndik: “Sabah” və “Neftçi” əlində olan imkanlarına görə Elvini transfer edə bilər. Nəyin buna mane olduğunu bilmirəm. Bu klubun şəxsi məsələsidi. Bəlkə komandaların oyun sisteminə uyğun olmadığından, heyətdə kifayət qədər futbolçu olmasından və ya maliyyə səbəblərindən ola bilər. Məncə, Elvin hər bir klubun istəyə biləcəyi oyunçudu. Nəzərə alsaq ki, söhbət yerli çempionatdan gedir. Elvinin “Qarabağ”ın toplanışa gedən heyətinə qoşulması, təbii ki, normaldı. Ağdam klubu ilə müqaviləsi var. Gələcəyinin necə olacağını zaman göstərəcək”.
Xatırladaq ki, Cəfərquliyevin “Qarabağ”la müqaviləsinin müddəti 2027-ci ilin iyununda başa çatacaq.
İSRAYIL XEYRULLAYEV