Uayt boksdakı biznes strategiyasını UFC üçün yararsız sayır.

UFC rəhbəri Dana Uayt belə hesab edir ki, boksçular aldığı pulu haqq etmir. O, həmçinin belə hesab edir ki, boksdakı biznes strategiyası ətrafında 750-ə yaxın döyüşçünü birləşdirən UFC kimi liqaların idarəçiliyi üçün yaramır:

“Hələ bir dəfə də “çox pul qazanıram, bu qədər qazanmağa hazır deyiləm” deyən adama rast gəlməmişəm. Hamı çox pul istəyir. Boksun ən böyük problemlərindən biri budu ki, bu adamlara hər dəfə artıq pul verirlər. Boks sənayesində təşkilatçılar azarkeşlərdən bacardıqca çox pul qoparmağa çalışırlar. UFC kimi liqanı belə biznes strategiyası üzərində qurmaq olmaz. Belə yanaşma ilə ailələrinin qayğısına qalmalı olan 750 döyüşçünün müqavilə öhdəliklərini yerinə yetirə bilməzsən. Bizdə belə sistem işləmir. Biz nə etdik? Qurduğumuz biznes modelinə görə, çempionsansa, pullu yayınların satışından faiz götürürsən. Lap belə möhtəşəmsənsə, reytinqin önündəsənsə, tamaşaçıların diqqətini cəlb edirsənsə, sənə də faiz verməyə hazırıq. Çoxlu narazı döyüşçülər deyirlər: “30 milyon dollar almaq istəyirəm”. Yaxşı, sən bunu haqq etmisənmi? Hər birimiz 30 milyon dollar istəyirik. Belələri sənin dəlillərinə tüpürmək belə istəmir, çünki özlərini bossa və onun biznesinə də tüpürməyə hazır olan ulduz sayırlar. Mən həmişə deyirəm: “Gördüyüm iş xoşuna gəlmirsə, öz biznesinə başla, döyüşçülərə də istədiyin qədər ver”. 20 il ərzində bütün dövrlərin ən uğurlu idman liqalarından birini qurmuşuq. Adamlar bu idman növünün necə sürətlə inkişaf etdiyini görür, bu üzdən liqaya insvestisiya qoymağa hazırdılar. Bu qurumun pulunu sormaq niyyətində olan adamları yanımda saxlamayacam”.

UFC ulduzlarından biri, 38 yaşlı Toni Ferqyuson isə belə hesab edir ki, Uayt özünü narkotacir kimi aparır və döyüşçülərə lazımi qədər pul vermir:

“Düşünürəm ki, UFC döyüşçülərinə az pul verirlər. Ancaq bu mövzu üzərində çox dayanmaq istəmirəm. Bir dəfə Dana Uaytdan xahiş etdim ki, boks qaydaları ilə döyüşməyimə icazə versin, imtina etdi. Söhbət nədən gedir? Mən başqa təkbətək döyüş növləri ilə də məşğul olmaq istəyirəm, idmançıyam. Müxtəlif idman növləri ilə yüksək səviyyədə məşğul olmaqla böyümüşəm. Boks görüşlərinə çıxmaq istəyirəm, amma özünü narkotacir kimi aparan birisi var (Uaytı nəzərdə tutur – red.), nə etməli olduğuma dair göstəriş verir. Mən isə ailəm üçün daha çox pul qazanmaq istəyirəm.

Ferqyuson həmçinin belə düşünür ki, UFC yüngül çəkidə müvəqqəti çempion adını ondan alanda Uaytı məhkəməyə verməliymiş:

“Qəzaya düşdüyümə görə tituldan məhrum olunanda UFC haqda məhkəmə iddiası qaldırmalıydım. Onda düşündüm ki, qurumda mənə yaxşı münasibət bəsləyirlər. Kişi kimi hərəkət etdim”.

Onu da xatırladaq ki, mayın 8-də ABŞ-ın Finiks şəhərində keçiriləcək UFC 274 turnirinin əsas döyüşündə amerikalı Ferqyuson həmvətəni Maykl Çendler ilə qarşılaşacaq.