Fanatlar Korneliusun butsularını oğurluyublarmış
''Trabzonspor''un ulduzlarından biri olan və komandanın bu mövsüm çempionluq həsrətinə son qoymasında böyük rol oynayan Andreas Kornelius vətəni Danimarka mətbuatına açıqlamalar verib.
Hazırda 15 qolla superliqada bombardirlər yarışına başçılıq edən 4 futbolçudan biri olan Kornelius ''Antalyaspor''a qarşı çempionluq matçının ardından yaşanan izdiham zamanı başına gələnlərdən danışıb: ''Yüzlərlə, hətta minlərlə azarkeş final fitindən dərhal sonra zəfəri qeyd etmək və futbolçulara toxunmaq üçün meydana axışdı. Az qala onların əlindən qaçmaq məcburiyyətində qaldıq. Amma bacarmadıq. Məni əllərinə alıb havaya qaldırdılar. Həmin məqamda hətta butsularımı da ayağımdan çıxarıb oğurladılar. Həmin gün yaşanan çılğınlığı mən və komanda yoldaşlarımız həyatımızın sonuna qədər unutmayacağıq. Bu yaşadıqlarımızı tam dərk etmək üçün bir qədər zaman lazımdı. Çempionluq sevincləri indiyə qədər də şəhərdə davam edir. İnsanlar yolda komandanın hər hansı bir üzvünü görəndə dəlicəsinə sevinirlər. Açığı çempion olduğumuz gün stadiondakı izdihamda azyaşlı uşaqları görəndə bir qədər narahatlıq yaşamışdım. Çünki işlər cığırından çıxmaq üzrə idi və o qədər insanın arasında onlara nəsə ola bilərdi. Amma yaxşı ki, uğursuz bir olay yaşanmadı''.
Digər xəbərlər
