Premyer-Liqanın 22-ci turunda “Qəbələ” “Sumqayıt”ı qonaq etdi.

5 oyundu qələbəyə həsrət qalan meydan sahiblərinin bu matçda qalib gələcəyinə, yəqin ki, Baqanın da şübhəsi yox idi. Amma bu dəfə də proqnozlar doğrulmadı. Mövsümün əvvəlində turnir cədvəlinə “Qarabağ”la birlikdə şərikli liderlik edən Elmar Baxşıyevin komandası indi “Sabah”la ölüm-dirim savaşına girib. Ancaq rəqiblə müqayisədə döyüşdə qan itirə-itirə irəliləyir. Ardıcıl iki turdu autsayderləri sevindirən bölgə təmsilçisinin bu vəziyyəti heç də yaxşı əlamət deyil. “Qırmızı-qaralar”ın avrokuboklardan kənarda qalmaq təhlükəsi artıq son həddə çatıb.

Deyə bilərsiz ki, “Zirə”ni niyə bu siyahıya qatmırsan? Axı bu komanda da 4 oyundu qələbəyə sevinmir. Amma belə bir reallıq var ki, Rəşad Sadıqovun komandası “Qəbələ” ilə müqayisədə fiziki cəhətdən daha dözümlüdü. Bəlkə də “münəccimliyim” səhv çıxacaq. Lakin “qartallar”ın 3-cü, ən pis halda isə 4-cü pillədə olacağını düşünürəm.

“Sabah”a gəlincə, Masazır təmsilçisində işlər qaydasında gedir. Doğma meydanda “Qarabağ”a 0:1 hesabı ilə məğlub olandan sonra “Səbail”, “Sumqayıt” və “Zirə”yə qalib gəlməklə həm “Qəbələ”, həm də “Zirə” ilə xal fərqini azaldan Murad Musayevin komandası “Neftçi” ilə oyuna ən azı 1 xal qazanmaq üçün çıxacaq. “Bayquşlar”da əhval-ruhiyyə yüksəkdi. Son çempiona qalib gələcəkləri təqdirdə “Qəbələ” ilə xal sayını bərabərləşdirəcəklər. Bu da onlara əlavə stimul verəcək. Bəndənizin dediyi gerçəkləşərsə, “qırmızı-qaralar”ın “Sabah”a gücü çatmayacaq. İndi isə keçək vəziyyətin bu yerə gəlib çatmasının səbəblərinə...

“Qəbələ” mövsümə uğurlu başladı, qış fasiləsinə 2-ci pillədə yollandı. Amma sonra çarx bölgə klubu üçün tərsinə fırlanmağa başladı. Bunun səbəbi heyətin geniş olmamasıdı. Elmar Baxşıyevin əlində böyük imkanlar yoxdu. Hər oyuna aşağı-yuxarı eyni heyətlə çıxmağa məcburdu. İki dövrədi şahidi olduğumuz kimi, artıq oyunçuların dözümü də qalmayıb. Onları da başa düşmək mümkündü. Ehtiyat qüvvə olmadığına görə yorğunluq da artır. Bu da futbolçuların fərdi qabiliyyətlərinin, performanslarının düşməsinə səbəb olur. Uğursuzluq zolağına düşmələrinin başqa səbəbi isə zədələrdi. Sözsüz, bunun da kökündə fiziki vəziyyətin yaxşı olmaması dayanır. Üçüncü səbəbə gəlincə, təəssüf ki, qapıçı Nicat Mehbalıyev ümidləri doğrultmur. Gənc qolkiperin hər qarşılaşmada yol verdiyi səhvlər komandaya baha başa gəlir...

“Qəbələ”nin əksinə, Masazır təmsilçisi mövsümə heç də yaxşı başlamamışdı. Autsayder idi. İnanmıram ki, kimsə “Sabah”ın bu dərəcədə toparlanacağını, hətta avrokuboka iddialı olacağını düşünsün. Murad Musayev gəlişi ilə Elmar Baxşıyevin lehinə fırlanan çarxı öz xeyrinə dəyişdi. Baxımlı hücum futbolu oynayan, eyni zamanada müdafiəni diqqətsiz qoymayan komanda yaratdı. Əslində bunu yalnız rusiyalı mütəxəssisin uğuru adlandırmaq bəlkə də düzgün olmaz. Bu yüksəlişdə İqor Ponomaryovla Vitali Kovalyovun da rolu böyükdü. Olimpiya çempionunun transfer siyasətini düzgün aparması bu gün “Sabah”ı bu pilləyə gətirib çıxarıb. “Bayquşlar”ın ispaniyalı legionerləri hər oyunda sözlərini deyir. Komanda “Qəbələ”dən fərqli geniş ehtiyat oyunçular skamyasına sahibdi. Bugünkü “Sabah”dan çempionatda baxımlı və iddialı mübarizə apran iki komanda yaratmaq mümkündü. Əsas rəqibinin əksinə, qapıda da problemləri yoxdu. Səlahətin təcrübəsi ilə yanaşı, 3 oyundu komandanın qapısını layiqincə qorumağı bacaran 20 yaşlı Yusif İmanov da Murad Musayevə güvən verir. Fikrimcə, baş məşqçinin futbolçuya olduğu kimi, futbolçunun da baş məşqçiyə təsiri böyükdü. “Sabah”ın oyunçuları Musayevə güvən verməyi bacarırlar. “Qəbələ”də isə bundan söhbət gedə bilməz. Hər matçda təkrarlanan səhvlər, ikili mübarizələrdə zəiflik, kasad heyət Baxşıyevin bu mübarizədə şansını azaldır. Bunu xüsusi qeyd etməliyəm ki, Baxşıyev əlindəki imkanlarla formalaşdıra biləcəyi heyətin ən yaxşısını qurub. Amma Musayevin hələ də beynində “oturda” bilmədiyi məqamlar var. Bu da bəzi oyunlarda ona qarşı çevrilə bilər. Görək bizi nələr gözləyir...

SƏNƏM FƏRHADOVA

Qeyd, yazı ötən günün oyunlarından öncə yazılıb.