Premyer-liqanın 23-cü turunun ilk qarşılaşması bölgədə baş tutdu.

Avrokuboklara iddialı “Qəbələ” autsayderlər sırasında yer alan “Sumqayıt”ı qonaq edirdi. Ardıcıl 5 oyunda qələbəyə hərət qalan Elmar Baxşıyevin komandasının “kimyaçılar”ı çətinlik çəkmədən məğlub edəcəyini düşünənlərin sayı çox olsa da, əksi yaşandı. “Qəbələ” son anda yenilgidən xilas oldu. Düzdü, oyundan sonra 2-ci hissədə qonaqların qapısına verilməyən penalti çox söz-söhbət doğurdu, mübahisə mövzusuna çevrildi. Ancaq bu narazılıq nəticəni dəyişmədi və fakt budu ki, “Qəbələ” ardıcıl 6-cı matçda qələbə qazana bilməməklə azarkeşlərini üzdü.

Günün ikinci oyunu Suraxınada keçirildi. De-yure olmasa da, de-fakto çempionluğu təmin edən “Qarabağ” bir həftə əvvəl yeni ad altında meydana çıxan “Şamaxı” ilə qarşılaşırdı. 30 ildən sonra ölkənin futbol ailəsinə dönən “Şamaxı” ötən həftənin cümə bəlkə də yeni tarixinin ən qara gününü yaşadı. Ağdamlılar artıq ilk hissədə rəqibi 7 dəfə cəzalandırmaqla oyunun taleyini faktiki həll etdi. Fasilədən sonra sanki rəqibə güzəşt edən “köhlən atlar” Namaşkonu cəmi bir dəfə topu tordan çıxarmağa məcbur etdi. Yeri gəlmişkən, 8:0 “Qarabağ”ın tarixinə ən böyükhesablı qələbə kimi düşdü.

Ardıcıl 4 oyunda 3 xala həsrət qalan “Zirə”, nəhayət, “Səbail”lə matçda qələbə qazanmaqla azarkeşlərini sevindirməyi bacardı. Rəşad Sadıqovun komandası ilk yarıda iki qol vurmaqla böyük ölçüdə qarşılamanın taleyini həll etdi. Həftəiçi ölkə kubokunun yarımfinalında “Neftçi” ilə qarşılacaq “qartallar” fasilədən sonra bir qədər süst görünsə də, 90+5-ci dəqiqədə qapısında qol görsə də, oyunu qalib başa vurmaqla bir gün əvvəl heç-heçə edən “Qəbələ”dən bir qədər də aralandı. Artıq 3-cü pillədə qərarlaşan “Zirə” ilə bölgə təmsilçisi arasında 4 xallıq fərq var. Meydan sahiblərinin heyətində dublla yadda qalan Keytanı xüsusi fərqləndirmək lazımdı. Qəsəbə təmsiulçisinin qış fasiləsində heyətinə qatdığı ucaboy futbolçu irəlidə universallığı ilə seçilir və çempionatın bombardiri Volkovun “ayağının bağlandığı” məqamda komandanın əsl liderinə çevrilib. “Zirə” buy ay Konfrans Liqasında iştirak edəcəyi təqdirdə Keytanın kollektivin əsas siması olacağı artıq heç kimdə şübhə doğurmur.

Və turun son qarşılaşması - hamının maraqla gözlədiyi “Neftçi” – “Sabah” görüşü. Son 3 oyunu qələbə ilə başa vuran “tələbələr” “Bakcell Arena”dan da 3 xalla ayrılmağı qarşıya məqsəd qoymuşdu. Bir gün əvvəl “Qəbələ”nin heç-heçə oynaması Murad Musayevin komandası üçün 4-cü pilləyə yüksəlmək baxımından əlavə motivasiya idi. Ancaq Samir Abasov və yetirmələri bərbad oyunla da olsa, ardıcıl 7-ci matçda uğur qazanmaqla bəlkə də “Sabah”ı avrokubokdan kənarda qoydu. Onu da qeyd edək ki, bu oyunların 6-dan qalib ayrılan “ağ-qaralar” yalnız bir görüşdə “sülh bağlayıb”. Qonaqlar xüsusilə 2-ci hissədə meydan sahiblərinin qapısına “oturmaqla” yadda qaldı. Ancaq ilk yarıdakı avtoqolun əvəzini çıxmaq mümkün olmadı. Abasov oyunsonrası mətbuat konfransında “qələbənin pisi, yaxşısı olmur” deməklə bir növ rəqibin daha yaxşı təsir bağışladığını etriaf etsə də, 3 xala görə futbolçularına təşəkkür etməyi də unutmadı.

Sonda bombardirlər siyahısında artıq ikihakimiyyətliliyin yarandığını da vurğulayaq. Uzun müddət ən sərrast futbolçular siyahısına təkbaşına başçılıq edən Volkov artıq liderliyi “Şamaxı” ilə matçda dublla yadda qalan Ozobiçlə bölüşmək məcburiyyətindədi.

Azərbaycan premyer-liqası
4-cü dövrə, 23-cü tur
15 aprel

Qəbələ - Sumqayıt 1:1
Qarabağ – Şamaxı 8:0
16 aprel
Zirə - Səbail 2:1
Neftçi – Sabah 1:0

1.Qarabağ 22 17 4 1 57-11 55
2. Neftçi 23 13 5 5 38-25 44
3. Zirə 23 11 6 6 31-24 39
4. Qəbələ 23 9 8 6 32-31 35
5. Sabah 23 10 2 11 31-29 32
6. Şamaxı 23 5 5 13 24-41 20
7. Sumqayıt 22 3 6 13 13-36 15
8. Səbail 23 4 2 17 17-46 14

Bombardirlər: Volkov (Zirə), Ozobiç (Qarabağ) - 10, Mikels (Sabah) - 9, Zubir, Vaci (hər ikisi "Qarabağ") - 8.

Növbəti turun oyunları: 24 aprel – Qəbələ - Qarabağ, Sumqayıt – Zirə, Səbail – Neftçi, sabah – Şamaxı.

RƏŞAD