Ölkə çempionatının 22-ci turu çərçivəsində ötən gün baş tutan "Şamaxı" - "Neftçi" (1:2) matçından sonra meydan sahiblərinin uzun müddətdi görünməyən, vəzifəsindən gedəcəyi ilə bağlı haqqında iddialar yayılan prezidenti Zaur Axundov jurnalistlərin suallarını cavablandırdı...

- Məğlubiyyət yerinə düşmədi. Bu gün bu cür azarkeşlərin qarşısında qələbə qazanmaq istəyirdik. Komandamız hesabda önə çıxan kimi müdafiə futbolu oynayır. Bu da xoş hal deyil. Yaxşı imkanlarımız var idi, dəyərləndirə bilmədik. Futbolda belədi, sən vurmadınsa, sənin qapına vuracaqlar. Eyni şeylər təkrarlanır. Bunlara son qoymaq lazımdı və qoyulacaq. Baş məşqçi ilə söhbətim olacaq.

- Bundan sonra ev oyunlarınızı Şamaxıda keçirəcəksiniz. Bu məqam komandanın nəticələrinə yaxşı mənada təsir edə bilər?

- 100 faiz. Bu gün də qələbə qazana bilərdik. Təəssüflənirəm ki, bu qədər azarkeşin önündə, bu cür dəstəyin qarşılığında qalib gələ bilmədik. Ən azı 1 xal qazanacağımızı düşünürdüm.

- Komandanın məskunlaşması ilə bağlı planınız nədən ibarətdi? Bakıda qalacaqlar, yoxsa Şamaxıda?

- Hələ ki, komanda Bakıda – “ASK Arena”da məskunlaşacaq. Məşqlərimiz də orada olacaq. Cari mövsümü bu şəkildə başa vuracağıq. Amma belə çox getməz. Növbəti mövsüm üçün nəsə fikirləşib, qərar qəbul edəcəyik. Həm də “ASK Arena” ilə müqaviləmiz var deyə, anlaşmanın sonuna qədər orada olmalıyıq.

- Avrokuboklara vəsiqə böyük ölçüdə əldən gedib. Razılaşırsınız yəqin...

- Təbii ki.

- Belədə komandada dəyişikliklər gözlənilirmi?

- Dəyişikliklər mütləq olacaq.

- Baş məşqçi göndəriləcək, yoxsa heyəti dəyişəcəksiniz?

- Mayın sonuna qədər gözləyək. Həmin vaxt özünüz görəcəksiniz. Bu dəqiqə əsas məqsədimiz növbəti oyunlarda azarkeşlərimizi sevindirməkdi. Bu, bizim borcumuzdu.

- Büdcədə necə, yaxşı mənada dəyişiklik gözlənilir?

- Bu barədə indi nəsə demək çətindi. Mövsüm başa çatsın, büdcə məsələsinə baxılacaq.

- Klubdakı gələcək taleyinizlə bağlı müxtəlif xəbərlər dolaşır. Buna da aydınlıq gətirərdiniz.

- Hansı xəbərlər?

- “Şamaxı”dakı postunuzdan ayrılacağınızla bağlı xəbər.

- Bu dəqiqə qarşınızda dayanıb müsahibə verirəm. Demək ki, klubdayam

İLKİN SULTANLI