"Təəssüf ki, səhvlər ucbatından qapımızda 3 qol gördük. Hər halda, Avropa Liqası bizim üçün başa çatdı. Bütün bu matçlar bizim üçün böyük təcrübə oldu. Keçirdiyimiz oyunlar gələcəkdə öz faydasını verəcək. Avropada futbol köklü şəkildə dəyişir. Mən həmişə futbolçularıma yaxınam. Bütün bu illər ərzində biz çoxlu belə matçlardan keçmişik. Həm uğurumuz, həm də uğursuzluğumuz olub”.

"Mən dəfələrlə demişəm ki, hər il uğur qazanmalıyıq deyə bir qayda yoxdu. Pis mövsümlər də olur. Bəli, çox şey əldən verdik. Bu o deməkdi ki, müdafiədə zəif oynadıq və bunu qəbul etmək lazımdı. Amma çox yaxşı komandalara qarşı matçlar keçirdik. Bəli, ötən mövsüm biz daha yaxşı nəticə əldə etmişdik. Lakin bu mövsüm qarşımıza qoyduğumuz məqsədə çata bilmədik. Bəzən rəqibin səndən üstün olur. Bu gün birinci hissədə hər şey yaxşı idi. Amma belə matçlarda təzyiqi sona qədər saxlamaq vacibdi. Bəli, problemlərimiz var və biz onları aradan qaldırmağa çalışırıq. Digər tərəfdən, bir il ərzində komandanı eyni səviyyədə saxlamaq çox çətindi. Çünki futbol komanda oyunudu. İstənilən halda, bu mövsüm bizim üçün böyük təcrübə oldu. Oyunumuzu daha yaxşı təhlil edib səhvlərimizi görməyə vaxtımız olacaq".

"Bu böyük bir mövzudu. Suala cavab vermək üçün lazım olan təfərrüatlara varsam, çox vaxt aparacaq. Juninyo komandamızda olarkən əsas mərhələdə keçirilən 6 matçdan 5-də uduzduq. Nəticələr göstərir ki, oyunumuz kifayət qədər zəifdi. Lakin bəzi matçlarda çox yaxşı görünürdük. 5 milyondan danışsaq, bu, vəziyyəti yaxşılaşdırmayacaq. Əsas mərhələnin 36 iştirakçısının büdcəsini sıralasaq, biz sondan 3-cü və ya 2-ci olacağıq. Büdcəsi yüz milyonlarla hesablanan komandalara qarşı oynadıq. Onların futbol təfəkkürü nəzərə alınaraq, bir-iki milyona futbolçu almaqla işimizin düzələcəyini söyləmək düzgün olmaz. Bu və ya digər futbolçunun bizə gəlmək istəyəcəyi məlum deyil. Yenə də bunu ətraflı müzakirə etmək lazımdı. Biz heç vaxt futbolçuları 5 milyona satmamışıq. Yüksək keyfiyyətli komanda formalaşdıraraq işimizi çox gözəl idarə etmişik. İndi "Qarabağ" yüksək keyfiyyətdədi, sadəcə, bu Avropa mövsümü uğursuz oldu. Komandanın gücləndirilməsinə gəlincə, biz bütün il bu barədə düşünürdük. Təəssüf ki, bəzi çətinliklərimiz oldu. Amma hələ vaxtımız var və inanıram ki, bunun ən az 50 faizini reallaşdıra biləcəyik".