“Sabah” səfərdən sərfəli nəticə ilə dönsə də, cavab görüşünün asan keçməyəcəyi öncədən proqnozlaşdırılırdı. UEFA da matça ciddi yanaşaraq İsveçrədən olan hakimlər briqadasına üstünlük vermişdi. Referi ilk dəqiqələrdən prinsipiallığını göstərərək güzəştə getməyəcəyini nümayiş etdirdi. Görüş ilk oyunun davamını xatırladırdı. İkili mübarizələr, futbolçuların meydanın hər qarışı uğrunda amansız döyüşü, barışmaz mövqeyi, qələbə əzmi... Belə matçlarda hakimlərin üzərinə böyük yük düşür, daha diqqətli, məsuliyyətli olmalıdılar. Baş hakim futbolçulara qədərində olmaqla sona kimi oynamağa imkan yaradırdı. Qaydalar çərçivəsində ilk andaca sarı vərəqələrin dərhal göstərilməsi “qırmızı” ehtimalını artırırdı. Qonaqlar birinci hissədə üstün görünürdü, oyuna aludə olduqlarından, tezliklə geridönüş etmək istədiklərindən referinin güzəştsiz yanaşmasını, idarəçilik tərzini unutdular və gözləmədikləri anda bunun acısını çəkdilər. Oyuna nəzarəti ələ keçirdikləri dəqiqələrdə sarı, az keçmədən qırmızı vərəqə gördülər. Bu azmış kimi, mübahisəyə görə kapitanları rəsmi xəbərdarlıqla, baş məşqçiləri isə qırmızı vərəqə ilə cəzalandırıldı. Baş hakim "heç kim həddi aşa bilməz" düşüncəsi ilə ağırlığını ortaya qoydu. Həmişə çılğın görünən Murad Musayev hakim psixologiyasını yaxşı bilir, həmkarının texniki zonadan uzaqlaşdırıldığını gördükdə sakit davrandı, futbolçularını da mübahisələrdən çəkindirdi. İsveçrəli hakimin final fiti sonda "Sabah"ın tarixi mərhələ keçidini rəsmiləşdirmiş oldu". 

"Macar referi isveçrəli həmkarından daha təmkinli davranır, ikili mübarizələrdə şifahi xəbərdarlığa üstünlük verirdi. Qonaqlar riskli davranaraq, oyunu  müdafiədən yox, mərkəzdən qurmuşdu. Hiss olunurdu ki, "Neftçi" ilk dəqiqələrdən bunu gözləmirmiş. İkili mübarizələr, sərt oyun, qarşılıqlı hücumlar çoxluq təşkil edirdi. Referi sona kimi oynamağa şərait yaratsa da, oyun epizodlarında güzəştə, şifahi yanaşmaya üstünlük versə də, futbolçuların, texniki zonanın intizamsızlığına, hakimlə mübahisələrinə yol vermir, dərhal sarı vərəqə ilə cəzalandırırdı. Bakılılar öndə pressinq nəticəsində ilk qolu vuraraq hakimlər briqadasının da işini yüngülləşdirmiş oldular, oyun nisbətən sakit məcrada davam etdi. Referi ancaq keçilməz epizodlarda əlini cibinə atır, futbolçilara “sarı” göstərirdi. Yeganə Azər Salahlı epizodunu baş hakim tam dəqiq ayırd edə bilmədi. Sarayevoda keçirilən ilk qarşılaşmadakı hakim bacarıqsızlığı, azarkeşlərin stadiondakı özbaşınalığı, hörmətsizliyi fonunda cavab görüşü istər meydanda, istərsə də tribunalarda fanatların göstərdiyi nümunəvi futbol mədəniyyəti ilə yadda qaldı. Azərbaycan futboluna, "Neftçi"yə, azarkeşlərimizə yaraşan da budu”.