Tahir Süleymanov almanları hakimlərimizə nümunə göstərdi
Yığmamız Millətlər liqasının seçmə mərhələsində Qazaxıstanı 3:0 yenməklə qrup ikincisi oldu.
Football-plus.az xəbər verir ki, 4 gün əvvəl "Dalğa Arena"da keçirilən matçı Harm Osmersin rəhbərlik etdiyi, Almaniyadan olan hakimlər briqadası idarə edirdi. Onların üzərinə böyük yük düşmədi. Yalnız 35-ci dəqiqədə rəqib futbolçu Nuralı Alip birbaşa qırmızı vərəqə ilə meydandan qovuldu. Ümumilikdə referilər tempin aşağı düşməsinə imkan vermədilər.
Hakimlərin idarəçiliyini daha detallı qiymətləndirmək üçün Tahir Süleymanovun fikirlərini öyrəndik:
"Qrup liderliyini təmin edən, qarışıq heyətlə meydana çıxan rəqib çox istəkli, motivasiyalı görünürdü. İkili mübarizələr tez-tez baş verir, futbolçular sərt oyundan çəkinmirdi. Almaniyalı hakimlər briqadası buna hazır idi. Futbolçulara sona kimi oynamağa şərait yaradır, hər xırda fola önəm vermirdi. Bu tərzdə idarəçilik matçın tempinin aşağı düşməsinin qarşısını alır, əksinə, futbolçular daha da qızışır, emosional oyuna üstünlük verirlər. Baş hakim etirazlara, mübahisələrə daha həssas yanaşır, oyunçuların davranışını nəzarətdə saxlayırdı. Yerində göstərilən rəsmi xəbərdarlıqlar futbolçuların həddi aşmamasını şərtləndirirdi. Oyunun dönüş anı ilk yarının sonlarında qazax futbolçuya göstərilən qırmızı vərəqə oldu. Dadaşova qarşı kobud oyuna görə Alip dərhal referi tərəfindən cəzalandırıldı. Eddinin rəqibi təxribata çəkməsi də işə yaradı. Emosiyalarını cilovlaya bilməyən futbolçu onu itələdi. Referi qətiyyətlə ikinci sarı, ardınca qırmızı vərəqə ilə Qazaxıstan millisini azlıqda qoyaraq meydanda oyunun əsl hakiminin kim olduğunu nümayiş etdirdi. Hakimin idarəçiliyində alman dəqiqliyi sezilirdi. Referi - VAR otağı işbirliyi, əlaqə, sinxronluq, qərarların qəbulunda mükəmməl operativlik nümunəvi idi. Azərbaycan çempionatında tətbiq edilən VAR sistemi, hakimlər üçün dərslik ola bilər. Vurulan qolların yoxlanılması, penalti ehtimalının təkrar baxılması üçün, demək olar ki, görüş dayandırılmadı, fasilələr yaranmadı, matçın baxımlılığına xələl gəlmədi. Bir-iki xırda epizodu nəzərə almasaq, hakimlər briqadası oyunu yüksək səviyyədə idarə etdi".
ABDULLA İSMAYILOĞLU
Digər xəbərlər
