Tahir Süleymanov: “Referinin ingilisayağı idarəçilik tərzi ağdamlılara daha uyğun idi” - AÇIQLAMA
"Qarabağ" - "Lex" matçında ədaləti Endryu Medli, Daniel Kuk, Harri Leonard və Simon Huperin yer aldığı ingiltərəli hakimlər briqadası qorudu.
Onların idarəçiliyini dəyərləndirməsi üçün təcrübəli referi Tahir Süleymanovla əlaqə saxladıq:
"UEFA "Qarabağ" - "Lex" cütünə çox ciddi yanaşaraq hər iki görüşdə "böyük beşlik" ölkələrinin referilərinə üstünlük vermişdi. İlk qarşılaşmanı italyanlar idarə etdisə, cavab oyunu ingilis Endryu Medliyə tapşırılmışdı. İlk saniyələrdə buraxılan qol "Qarabağ"ı sarsıtmadığı kimi, baş hakimə də təsir göstərmədi. Onun ingilisayağı idarəçilik tərzi ağdamlılara daha uyğun idi. İkili mübarizələrdə sona kimi oynamağa imkan yaradır, hər xırda toxunuşa önəm vermirdi. Epizodları incəliyinə kimi sezə, kobudluğu sərt oyundan ayıra bilirdi. Qaydalar çərçivəsindən kənar sərt follara isə dərhal reaksiya göstərirdi. Belə yanaşmanın nəticəsidi ki, ilk yarıda haqlı olaraq Almeyda və Medina sarı vərəqə aldı. 37-ci dəqiqədə Elvin Cəfərquliyev də cəzalandırıla bilərdi, ingilis hakim “üstünlük” prinsipindən istifadə edərək sonda şifahi xəbərdarlıqla kifayətləndi. Ümumiyyətlə, futbolçular mübahisə edərkən, öz çempionatlarında olduğu kimi, onlarla şifahi izah-söhbətlərə üstünlük verərək oyunda tarazlıq yaradırdı. İngilis referi ilk dəqiqələrdən nüfuzunu, ağırlığını matça qoya bilmişdi. İkinci hissədə oyun prinsipiallığını qorusa da, referi təmkinini qoruyur, polşalıların psixoloji təzyiqinə önəm vermirdi. 3-cü qol ofsaydla bağlı mübahisə yaratsa da, “bir dəfə də avrokuboklarda bizim klubların bəxti gətirsin” düşüncəsi ilə üstündən keçmək daha doğru olar. Bu məqam "Qarabağ"ın möhtəşəm qələbəsinə kölgə sala bilməz. Dördüncü, beşinci qollar bu epizodu unutdurdu və son nəticəyə heç bir təsir göstərmədi. Baş hakimin inamlı idarəçiliyi komandalarla yanaşı, matçın baxımlı keçməsinə də müsbət təsir göstərdi. “Qarabağ” üçün növbəti mərhələdə də bu tərzdə hakimlik arzulayıram".
ABDULLA İSMAYILOĞLU
