"Sabah" avrokuboklarda ilk matçına çıxmasına, səfərdə çıxış eməsinə baxmayaraq, rəqibdən çəkinmədi, müdafiədən oynamadı, açıq oyuna üstünlük verdi. Ümumiyyətlə, oyun qarşılıqlı hücumlar şəraitində keçdi, demək olar ki, top mərkəzdə qalmırdı. Hər iki komanda tez-tez top itkisinə yol verir, ikili mübarizələr çoxluq təşkil edirdi. Belə görüşləri idarə etmək referidən konsentrasiya, daha çox diqqət tələb edir. Qarşılaşmada futbolçular ustalıq səviyyəsi ilə seçilməsələr də, matçın dinamik alınmasında baş hakimin də rolu var idi. O, futbolçuların sona kimi oynamasına, sərt mübarizələrə şərait yaradırdı. Referinin belə yanaşması bəzi hallarda aşırı olurdu, futbolçular zədə ilə üzləşirdi. Yaxşı ki, nəticədən asılı olmayaraq, rəqiblər meydanda bir-birinə hörmətlə yanaşır, kobudluq həddi aşılmır, futbolçular arasında qarşıdurmalar yaranmırdı. "Sabah"ın oyunçularının sarı vərəqə alması onların qalib gəlmək istəyinin nəticəsi idi. Baş hakim yerli-qonaq komanda amilini nəzərə alsaydı, komandamız oyunu azlıqda da bitirə bilərdi. Referi bəzi epizodlarda hər iki tərəfə qarşı baş verən kobudluqları sərt oyun kimi qəbul edib, davam işarəsi verirdi. Ümumilikdə hakimlər briqadası görüşün öhdəsindən yaxşı gəldi".