“Hakimlə bağlı ciddi mübahisələrə, müzakirələrə ehtiyac yoxdu”
"Qarabağ" ÇL-ın 3-cü təsnifat mərhələsində doğma meydanda "Rakuv"la cavab görüşünə çıxdı.
"Football-plus.az" xəbər verir ki, oyunu Sven Yablonskinin rəhbərlik etdiyi Almaniyadan olan hakimlər briqadası idarə edirdi.
Oyunboyu ciddi qayda pozuntuları və hakim səhvləri gözə dəymədi. Lakin fasilədən sonra rəqib hesabı açandan sonra bütün komanda ilə arxaya çəkildi. Polşalılar vaxtı öldürmək üçün tez-tez özlərini yerə atırdılar. Hətta həmişə soyuqqanlılığı ilə seçilən Qurban Qurbanov da bunları gördükdən sonra 4-cü hakimə emosional şəkildə etirazını bildirdi. Ədalət təmsilçilərinin işini qiymətləndirmək üçün təcrübəli hakim Tahir Süleymanova müraciət etdik:
"Matç tək klublar adına yox, hakimlər briqadasından da böyük məsuliyyət tələb edirdi. Görüşün sonunda rəqib cərimə meydanında mübahisəli 2-3 folu çıxmaq şərti ilə referi qarşılaşmanın səviyyəsinə uyğun hakim idi. Meydanda inamlı görünürdü, hadisələrin axarına nəzarəti əlində saxlayırdı. İkili mübarizələrə şərait yaratsa da, qayda pozuntularına dərhal reaksiya verirdi. Hər iki komandanın futbolçularına göstərilən sarı vərəqələr yerində idi. Rəqib futbolçular sonda "zədə" adıyla vaxtı uzatsa da, referi matça yetərincə dəqiqə əlavə edərək kompensasiya etmiş oldu.
Ümumilikdə bu görüşdə hakimlə bağlı ciddi mübahisələrə, müzakirələrə ehtiyac yoxdu. "Qarabağ"ın ilk oyundakı fərdi səhvləri cavab görüşünə damğa vuraraq cütün taleyini həll etdi".
ABDULLA İSMAYILOĞLU
Digər xəbərlər
