2021-ci il avqustun 5-də Lionel Messi “Barselona”nı tərk etdi. Təxminən bir ay sonra isə kataloniyalılar qürurla elan etdilər ki, klubun yeni “10 nömrə”si Ansu Fati olacaq.

"Football-plus.az" xatırladır ki, Leo gənc vingerə peşəkar karyerasının lap əvvəlində - Ansu əsas komandanın heyətində 16 yaşında fərqlənib klub tarixinə “ən gənc” qolun müəllifi kimi düşəndə xeyir-dua vermişdi.

Argentinalı belə deyirdi:

Həmin vaxtdan artıq 4 il ötüb. Fatinin 20 yaçı var, bütün karyerası irəlidədi, ancaq çoxları artıq onun adını “Qızıl top”un gələcək sahibləri siyahısından çıxarmağa imkan tapıb. Üstəlik Xavi ilə klubun futbolçunun xidmətində maraqlı olmamasıyla bağlı xəbərlər bir-birinin ardınca gəlir, agent Ansu üçün yeni klub axtarır, vingerin atası isə bir daha “Nou Kamp”da görünməyəcəyi ilə təhdid edir.

Tələsdilər

Messinin gedişi kataloniyalıların imicinə böyük zərbə oldu. Avropanın nəhənglərindən biri axmaqlıq üzündən (ancaq təkcə özünün yox) əfsanəvi futbolçusunu itirdi – böyük biabırçılıq idi. Onu unutdurmaq lazım idi və “Barselona” variantlardan ən pisini seçdi – yaşlı Messinin yerinə yenisini müəyyənləşdirdi, 10 nömrəli futbolkanı 18 yaşlı Fatiyə verdi. “Barselona”nın tipik yetirməsinə ulduz avansını verməsi, demək olar ki, həmişə futbolçuya təsir göstərir. Riki Puç, Boyan Krkiç və bu statusun öhdəsindən gələ bilməyən onlarla başqası dediyimiz tendensiyaya bariz nümunədi. Ansu da bu planda başqalarından heç nə ilə fərqlənmirdi, ona da çətindi, hərçənd böyüklər səviyyəsində ilk iki ildə parlaq oynayırdı. Belə görünürdü ki, bu oğlanda çox şey təbii yolla alınır. Ancaq rəhbərlik arxasına çox önəmli statusa işarə olan “10 nömrə”ni yapışdırmaqla “Barselona” futbolkasını Fati üçün ağırlaşdırdı.

Özü də vinger bu şərəfə yaxşı formada olmadığı, əksinə, zədədən əziyyət çəkdiyi, yəni perspektivinin dumanlı olduğu dövrdə layiq görüldü. İş elə gətirdi ki, Fati əfsanəvi “10 nömrə” ilə təxminən bir il sonra meydana çıxdı. Dərhal qol vursa da, ardından dahi sələfindən aşkar şəkildə pis oynamağa başladı.

Aydındı ki, Ansudan Messinin göstərdiyi səviyyəni gözləməyə dəyməzdi. Ancaq yeniyetmə tədricən inkişaf baxımından “əyləci basdı”, hansısa məqamda, ümumiyyətlə, geriləməyə başladı. “Barsa”nın daha bir açılmayan istedadı Boyan Krkiç deyirdi:


Və Fati çox önəmli “10 nömrə”ni əldə edəndən sonra bütün bu tarixçə başladı. Söhbət təkcə Ansunin çiyinlərinə çökən məsuliyyətdən getmir. Daha bir ciddi dəlil var.

Ansu büllurdandı, kataloniyalılar onu gözləməkdən bezib

Mistikaya meyl edənlər düşünə bilər ki, Messidən sonra “10 nömrə” lənətlənib. Sadəcə, ona görə ki, yeni sahibinə necə zərbə vurdusa, Fati hələ də özünə gəlməyib. Həmin formanı götürdüyü 2021/22 mövsümündə vinger 5 fərqli zədə almaqla ümumilikdə 35 oyunu buraxdı. Ona qədər də menisk yırtığı üzündən təxminən bir ili boşa vermişdi. 2021-də Fati meniskin qığırdaq astarını çıxarmaqdan boyun qaçırdı. Əvvəlki əməliyyatdan sonra ağrılar keçmədiyinə görə həkimlər məhz bu variantı təklif edirdilər. Belədə bərpa prosesi 6-7 həftə çəkə, ancaq növbəti 8-10 ildə oynaqlarda problemə səbəb ola bilərdi.

Məlumdu ki, “Barselona” cərrahi müdaxilə variantının üzərində dayanıb, ancaq Fati ağrını və dizindəki iltihabı azaltmaq üçün iynə vurdurmağı seçib. Nəticədə Ansu daha dörd zədə aldı, ümumilikdə 167 gün və 37 oyun buraxdı. Bütün bu zədələr bu və ya başqa şəkildə həmin bəlalı dizlə bağlı idi. Başqa versiya da var. “The Athletic” yazır ki, Fatinin meniskindəki ilk əməliyyat plan üzrə gedib, ancaq tibbi korpus hər gün bir əvəzinə iki bərpa seansı keçməyi lazım bilməklə prosesə müdaxilə edib ki, bu da oyunçunun sağlıq durumuna təsir göstərib, residiv yaradıb. Ancaq bütün bunlar söz-söhbətdi.

Fakt isə başqadı – komanda, demək olar ki, iki mövsümü Fatisiz yola verib, az qala hər kəsi sol cinahda sınayıb. Və nəhayət, Ansu hazır olanda qəfil Xaviyə lazım olmadı. Baxmayaraq ki, 2022/23 mövsümü Messinin varisi üçün əvvəlki illə müqayisədə daha yaxşı keçib. Axı o, əvəzedici oyunçu ola-ola, 51 oyunda iştirak edib, 10 qol, 4 məhsuldar ötürmə ilə yadda qalıb. Belə söhbətlər gəzirdi ki, Xavi vaxtilə Fatini erkən meydana qaytaran və zədəsinin dərinləşməsinə səbəbkar olan Kumanın səhvini təkrarlamaq istəmir.

“Barsa”nın indiki məşqçisi inanırdı ki, oyunçunu formasının zirvəsinə çıxaracaq və o, 16-17 yaşında olduğu kimi, yenə meydanda xarüqələr yaradacaq. Ancaq bu baş vermədi, Fati yenə də əvəzedici oyunçu kimi qalır. Hərçənd bəzən qol da vurur – hətta “el klasiko”da “Real”ın qapısına yol da tapıb. Ancaq Xavi son mövsümdə müxtəlif vaxtlarda sol cinahda ən fərqli ifaçılara – Torresə, Rafinyaya, Dembeleyə, hətta Qavi ilə Pedriyə də güvəndi. Fati isə 51 oyunun yalnız 14-də start heyətində göründü. Bəs hətta belə rəqabət fonunda da gənc istedadın əsas heyətə düşməməsinin səbəbi nədi? Kataloniya mediası iddia edir ki, Ansu ideal fiziki və mental formasından uzaqdı. İkiillik boşdayanma ona baha başa gəlib, futbolçu özünü qoruyur, sürəti və iti hərəkətləri itib. Belə göstəricilərə malik birindən isə məşqçi korpusu “10 nömrə” kimi yararlanmaqda məna görmür.

Bəs sonra?

İrəlidə ancaq dumanlı perspektivdi. Fati qalmağı çox istəyir. Ancaq belə görünür ki, “Barsa”da ürəyində eyni istəyi daşıyan başqa adam yoxdu. Atası da narazıdı:


Klubda da Fatinin komandaya lazım olub-olmaması üzərində düşünürlər. Axı o, ildə təxminən 14 milyon avro alır ki, bu da klubda De Yonqla Levandovskidən sonra üçüncü ən yüksək əməkhaqqıdı. “Barsa”ya isə təcili maaş fondunu “yüngülləşdirmək” lazımdı.

İspaniyanın nüfuzlu media vasitələrinin yazdığına inansaq, Xavi rəhbərliyin Fati kimi mənasız mövsüm keçirən 23 yaşlı Ferran Torresi komandada saxlaması üçün israr edir. Baş məşqçi onun növbəti mövsümdə oyununu yaxşılaşdıracağına inanır, Fati ilə bağlı isə eyni əminliyi yoxdu.

Deyilənə görə, Ansu “Atletiko”ya, “Mançester Yunayted”ə keçə və ya oyun praktikası dalınca “Vulverhempton”a yollana bilər (onun agenti – portuqaliyalı Jorje Mendeş bütün müştərilərini bu kluba yığır). “Barselona”da isə Fatinin perspektivi gündən-günə daha dumanlı görünür. Və belə görünür ki, dünyanın ən yaxşı futbolçusu adını almağa iddialı olan istedad artıq heç vaxt bu arzuya çata bilməyəcək.