Bazar ertəsi axşam saatlarında Parisdə “Laureus World Sports Awards” mükafatının təqdimat mərasini keçirilib.

1999-cu ildə təsis olunan bu mükafat il ərzindəki uğurlarına görə idmançılara təqdim olunur. “İdman Oskarı” adlandırılan mükafatın builki qalibi Lionel Messidi. Argentinalı ulduz mükafatı alandan sonra publika önündə çıxış edib:

Messi bu mükafata iki dəfə yiyələnən yeganə futbolçudu. 2020-ci ildə isə mükafatı “Mersedes”in pilotu Lüis Hemiltonla bölüşmüşdü. “İlin idmançısı” kateqoriyasında mükafatı almağa namizədlər siyahısında argentinalıyla yanaşı, Kilian Mbappe (Fransa, PSJ, futbol), Maks Ferstappen (Niderland, “Formula-1”), Arman Düplantis (İsveç, şüvüllə tullanan), Rafael Nadal (İspaniya, tennis) və Stefen Karri (ABŞ, “Qolden Steyt”, basketbol) da var idi. Messi həm “ilin idmançısı”, həm də Argentina yığmasının kapitanı kimi “ilin komandası” mükafatını qazandı.

Leonun mərasimə xanımı Antonello Rakutso ilə birgə qatıldığını da vurğulayaq. İştirakçılar sırasında “Barselona”nın ulduzu Robert Levandovski də var idi. Leo ilə Robert mərasimdən əvvəl Kataloniya klubunun indiki durumu ilə bağlı söhbət etdi.

PSJ-nin adını çəkmədi, azarkeşləri qəzəbləndirdi

Leonun çıxışında “Barselona”da keçirdiyi illəri xatırlaması, iyunun 30-na qədər müqavilə ilə bağlı olduğu PSJ-nin adını çəkməməsi birmənalı qarşılanmadı. Onun Paris klubunun oyunlarına çıxmaq imkanından məhrum olunmasıyla bağlı son günlərdə yaşanan qalmaqalı nəzərə alanda belə davranış bəlkə də məntiqli görünür. PSJ rəhbərliyinin argentinalı ulduzdan buna görə inciyib-incimədiyi bilinmir. Ancaq parisli azarkeşlər sosial şəbəkədə Leonun çıxışına reaksiya verməkdədi.

PSGfan1667: “Onun PSJ-nin adını çəkəcəyini niyə gözləyirdiz ki? Ona Parisdə nifrət edirlər. Enində-sonunda Messi də adamdı”.
Mallam Mohamed AYOBA: “Bu ulduzlar çörək qazandıqları yeri etiraf etmək istəmirlər. Həmişə demişəm ki, Messi və Neymar burda məzuniyyətdədilər”.
Olivier Rouillard: “Messi PSJ-yə yalnız dünya çempionatına hazırlaşmaq üçün qoşuldu”.
Daniele Berthelemy: “Leonun PSJ-nin adını çəkməməsi kədərli məqamdı”.
SuperPatLeGuen: “Hər şey deyildi, əlvida, mister Messi, sənin üçün darıxmayacağıq. Ümid edirəm ki, mümkün qədər tez gedəcəksiz. PSJ-yə hörmət göstərmədən bir gününüz də ola bulməz”.
Sirika 10: “Messini bu şəkildə təhqir edəndən sonra ondan nə gözləyirdiz ki?”
Hady Mamadie Toure: “Məhz PSJ ilə dünya çempionu olandan sonra “Barsa”da keçirdiyiniz günləri belə çox xatırlamağa başladız. Orda isə belə uğur yaşamamışdız. Məhz PSJ-də yeddinci “Qızıl top”u qazandız”.

Leonun son qərarı nə olacaq?

Messinin Səudiyyə Ərəbistanına səfəri ətrafında yaşanan qalmaqaldan xəbərdarsız. O, artıq səfəri başa çatdıraraq klubun düşərgəsinə dönüb. Kluba, oyundaşlarına ünvanlanan üzrxahlıq videosunu da hər kəs görüb. Qalmaqal bir qədər sakitləşsə də, argentinalı hücumçunun Fransa paytaxtında qalacağını təsəvvür etmək çətindi. Həm “Barselona” Lioneli geri qaytarmaq istəyir, həm də Səudiyyə Ərəbistanının “Əl-Hilal” klubu onunla ciddi şəkildə maraqlanır.

Ortada bir gerçəklik var ki, dünya ulduzu hələ ki karyerasını harda davam etdirəcəyi ilə bağlı qərar verməyib. Bu gün onu düşündürən əsas məsələ PSJ ilə Fransa çempionluğunu qazanmaqdı. Dünyaca məşhur insayder Fabritsio Romano sosial şəbəkə hesabında durumu belə anladıb:

“Leo Messi əvvəlcə Liqa 1-i qazanmaq, ardından əlində olan variantlara baxmaq istəyir. Hələ ki qərar qəbul olunmayıb. “Əl-Hilal”ın mövsümə görə 400 milyon avroluq təklifini Messi hələ apreldə alıb, ancaq hələ ki klubla futbolçu arasında heç bir anlaşma yoxdu. “Barselona” Lionelin transferi üzərində inadla çalışır. Hərçənd “maliyyə feyr-pleyi” üzündən bu keçidi reallaşdırmaq asan olmayacaq”.

Romanonun fikrincə, “Barselona” hələ də Messi üçün prioritet variant kimi qalır. Hətta onun dönüşünün gerçəkləşmək ehtimalı 1 faiz təşkil etsə də belə. Rafinyanın klubdakı gələcəyi də məhz Leonun transferindən asılıdı. Adı çəkilən insayderə inansaq, “blauqrana” braziliyalı yarımmüdafiəçi ilə vidalaşmaq istəmir, ancaq klub onu da dərk edir ki, bu satışdan yaxşı pul qazana bilər. “Barsa” argentinalını rənglərinə bağlaya bilməsə, Rafinya ilə bağlı indiki durum dəyişəcək.

Beləliklə, Messisevərlərə yalnız PSJ-nin Fransa çempionu olacağı günü gözləmək qalır. Məhz onda Leo gələcəyi haqda düşünə, dolayısıyla fanatlarını sakitləşdirə biləcək.

Reaksiyalar

Marko van Basten, Niderland yığmasının sabiq oyunçusu:

“Anlaya bilmirəm ki, çox pul qazanmaq üçün Səudiyyə Ərəbistanına yollanmağın mənası nədi. Axı o, bu pulu əvvəllər də qazanıb. Mənə belə hərəkət acınacaqlı görünür. Messi sevdiyi işlə məşğul olmalıdı, özü özünün rəisi olmalıdı”.

Xorxe Messi, Lionelin atası və meneceri:

“Növbəti il üçün heç bir klubla qətiyyən hansısa anlaşma yoxdu. Lionel PSJ-də mövsümü bitirənə qədər qərar qəbul olunmayacaq. Mövsüm başa çatandan sonra mövcud təkliflərə baxmağın və onları təhlil etməyin vaxtı çatacaq. Şayiələr həmişə gəzir, çoxları məşhurlaşmaq üçün Lionelin adından yararlanır.

Əmin edə bilərik ki, heç kimlə heç nə yoxdu. Nə şifahi, nə yazılı, nə razılaşdırılmış və mövsümün sonuna qədər də heç nə olmayacaq. Mənə elə gəlir ki, bu gerçəkçi mediaya hörmətsizlikdi. Elələri var ki, qəsdən və bilərəkdən dəlillərini əsaslandıran heç bir şey ortaya qoymurlar. Belələrinə xəbər yazarkən müxtəlif qaynaqlardan yararlanmağın zəruriliyini anlatmalı oluruq. Belələri həqiqətin onların “xəbərini” korlamasını istəmirlər”.

"Football-plus.az"