Bu mövsümün əsas “qol maşını” Erlinq Holannın “Santyaqo Bernabeu”dakı matçda yaxşı və ya pis performans sərgiləməsi ətrafında çox müzakirə aparmaq olar. Bəzilərinin fikrincə, Antonio Rüdigerin göz açmağa imkan vermədiyi Holann meydanda itib-batmışdı.

Təsadüfi deyil ki, o, “Mançester Siti”nin heyətində hamıdan, hətta qapıçı Edersondan da daha az topa toxunan futbolçu oldu. Maraqlıdı ki, yarımfinalda Erlinqdən çox onun atası Alf-İnge diqqət mərkəzinə düşdü.

Bilməyənlər üçün xatırladaq ki, Alf-İnge Holann da vaxtilə futbolçu olub və o da “Siti”nin şərəfini qoruyub. Ata Holann srağagünkü matçın gedişində VİP-lojada o qədər çılğınlıqlar etdi ki, təhlükəsizlik xidmətinin işçiləri matç bitməmiş onu ordan uzaqlaşdırmalı oldular! Sosial şəbəkələrdə yayılan həvəskar videodan da görünür ki, Alf-İnge onun qarşısındakı tribunada əyləşən “Real” fanatlarına bəzi jestlər edirmiş. O, xüsusilə De Bruynenin qoluna çılğın şəkildə sevinməyə başlayıb və əlini qulağına qoyaraq madridlilərə acıq verməyə çalışıb. Alf-İnge bəzi ədəbsiz jestlər də göstərib. Bu da son deyil.

İspaniya mətbuatının iddiasına görə, Holannın atası yediyi yeməyin qalığını fanatlara tərəf atıb və hətta onları təhqir də edib. Hərçənd paylaşılan videoda bunlar yer almayıb. Tərəflər arasında münaqişənin böyümək üzrə olduğunu görən stadionun təhlükəsizlik xidmətinin əməkdaşları VİP-lojaya gedərək emosional Holannı ordan kənarlaşdırıblar.

“Real” fanatları bu hadisəyə o qədər sevinib ki, “adios” (görüşənə qədər) şüarını səsləndirməyə başlayıblar. Alf-İnge artıq məsələyə münasibət də bildirib. O, “tvitter”dəki səhifəsində yalnız “Real” fanatlarının onun De Bruynenin qoluna sevinməsini xoş qarşılamadıqlarını yazmaqla kifayətlənib.

Erlinqə maraq göstərən klublardan birinin “Real” olduğunu nəzər alsaq, belə hadisənin yaşanması heç də xoş olmadı. İspaniyalı həmkarlarımızın yazdığına görə, bu qanqaraldıcı olay danışıqlar prosesinə təsir göstərə bilər.