İngiltərə premyer-liqasında “Mançester Siti”nin hansısa oyunda topa nəzarətdə total üstünlük qazanmaması nadir hadisədi.

Football-plus.az xəbər verir ki, “Brayton” bunu bacardı, hətta zaman-zaman “Siti”dən daha yaxşı oynadı. Düzdü, onda artıq hesab açılmışdı. Qonaqlar ilk qolu 22-ci dəqiqədə buraxdı. Fasilə ərəfəsində Holann Bernardoya qarşı kobudluğa görə təyin olunana penaltini də qola çevirdi. Yalnız 2-ci hissənin əvvəlində “Brayton” fəallaşdı, “şəhərlilər” isə “əyləci basdı”. Bu üzdən Trossarın 53-cü dəqiqədə gözəl zərbə ilə fərqi azaltması təəccüb doğurmadı. Bundan sonra “Brayton” təzyiqi bir qədər də artırdı. De Bruynenin uzaq məsafədən zərbə ilə vurduğu qol “Siti”ni əsəbi sonluqdan xilas etdi.

Bununla cari mövsümdə qol hesabını 17-yə çatdıran Holann “Siti”nin Serxio Aqueronun ardından ardıcıl 7 ev oyununda fərqlənən ilk futbolçusudu. Argentinalı bunu 2018-in fevralında bacarmışdı. 22 yaşlı norveçli komandasının heyətində bütün turnirlərdə keçirdiyi 15 oyunda 22 qol və 3 məhsuldar ötürmə ilə yadda qalıb.