İstanbul nəhənglərinin fanatları Zubirin transfer olunmasını istəyir - AÇIQLAMA
“Qarabağ”ın futbolçusu Abdullah Zubir “Qalatasaray”a qarşı xeyriyyə matçında performansı ilə türkiyəli azarkeşlərin diqqətini çəkib.
"Football-plus.az" xəbər verir ki, 31 yaşlı yarımmüdafiəçini “sarı-qırmızılar”ın heyətində görmək istəyən fanatlar bu məsələni sosial şəbəkələrdə gündəmə gətirib. Onlar klubun rəsmi səhifələrinə müraciət edərək rəhbərliyə transferin tezliklə gerçəkləşməsi ilə bağlı istəklərini çatdırıb. Türkiyə mətbuatının mövzunu işıqlandırmasından sonra məsələ daha da ciddiləşib. “Qarabağ”ın yeganə qolunun ötürməsini verən Zubir haqda maraqlı şərhlər yazılıb.
Jurnalist Yüksəl Aytuğ “Sabah” nəşrində dərc olunan köşə yazısında Abdulla haqda bunları qeyd edib: “Əli Koçun prezidentliyi dövründə “Fənərbaxça”ya gələnin, gedənin sayı-hesabı olmadı. Bir çox futbolçu transfer edildi. Dərdimizin dərmanı qarşımıza çıxıb. İndi əsas hədəf Zubir olmalıdı. Zubir kimdi? “Qalatasaray”ın qardaşlıq oyununda görüşdüyü "Qarabağ"ın “10” nömrəsi... O, hər halı ilə "10 nömrə" futbolçudu. Adam təkbaşına rəqib müdafiəsinin başını gicəlləndirdi. Heç bir müdafiəçi onun fintlərinə dözə bilmədi”.
“Fanatik” nəşrinin "Zubir "Qarabağ" - "Qalatasaray" matçına damğa vurdu" başlığı ilə yayınladığı xəbər trendləri alt-üst edib. “Sarı-qırmızılar”ın tərəfdarları burda da fəallıq göstərib. Məqalə haqda bildirilən fikirlər arasında “indiyə qədər harda idin?”, “sən nə imişsən!”, “dərhal Türkiyə klublarına transfer edilməlidi” kimi rəylər ən çox bəyənilmə sayı ilə fərqlənib.
Qardaşlıq görüşünə start heyətində çıxıb 90 dəqiqə meydanda olan vingerin “instaqram” hesabı ən çox axtarılanlar sırasındadı. İstanbul təmsilçisinin azarkeşləri rəy bölümünə axın edib. Onların “Türkiyəyə gəlsən, əla olardı”, “qardaşlığımızın inkişafı üçün bu adamı bizə verin”, “səbirsizliklə yolunu gözləyirik”, “Qalatasaray”lılar səni çox sevdi, oyunun adamı!”, “gələcəyinə əminik, əvvəlcədən Türkiyə superliqasında uğurlar”, “sarı-qırmızı forma sənə çox yaraşacaq”, “qardaşlarımıza pis xəbər: Zubir bizim olacaq” kimi şərhlərinə azərbaycanlı futbolsevərlər tərəfindən etirazlar bildirilib. Artıq “Beşiktaş” və “Fənərbaxça” azarkeşləri də bu yöndə təkliflər irəli sürüb. Düzdü, hazırda bu istiqamətdə rəsmi addım atılmayıb. Lakin klubların azarkeş maraqlarına uyğun çalışdığını nəzərə alsaq, bu gözləniləndi. Hər iki komandanın fanatlarının marağı Zubir üzərində toqquşur.
Məsələ ilə bağlı “Qarabağ”ın ən böyük azarkeş qrupu “İmarət Tayfa”nın mövqeyini öyrəndik. Daha öncə “Futbol+”ə açıqlamasında Kadi Borgesin transferinə etirazını bildirən fanklubun fəalı Elnur Quliyev bunları dedi:
“Abdulla Zubir təcrübəli və peşəkar futbolçudu. Bu günə qədər komandada performansı və ağıllı qərarları sayəsində böyük uğurlar qazanıb. Lakin mən topu özündə çox saxlayan oyunçuları sevmirəm. “Qalatasaray” azarkeşlərinin onu bəyənməsi təbiidi. Türkiyə təmsilçisi “Qarabağ”a rəsmi müraciət etsə, düşünürəm ki, transfer mümkündü. Belə əlamətdar hadisəni Azərbaycan futbolunun uğuru saymaq olar. Nəticədə həm idmanımız reklam olunar, həm də klubumuzun maliyyə gücü artar. Amma bunu doğru strategiya ilə etmək lazımdı. Zubirin əvəzləyicisini tapmadan belə addım atmaq yanlış olar. Yeni oyunçu alıb həqiqətən də Zubirdən daha yaxşı özünü göstərdiyinə əmin olandan sonra problem qalmaz. Konfrans Liqasında başverənlər də göstərdi ki, futbolçu transferi ciddi məsələdi və dəqiqlik tələb edir. Bizə əla oyunçular lazımdı. “Qarabağ”ı daha yüksək zirvələrə aparacaq simalarla işləməliyik. Həmin şəxslərin Zubir və ya başqası olması fərq etmir. Dediyim kimi, əsas odu, daha yaxşıları ilə daha irəli gedək”.
KƏNAN BAHADIR
Digər xəbərlər
