Veqhorst “Enfild”dəki lövhəyə toxundu, aləm qarışdı
“Mançester Yunayted”in “Enfild”dəki son darmadağının futbol yönləri ilə bağlı son günlər çox söz deyilib, çox danışılıb.
Azarkeşlər isə “qurbanlıq qoyun” axtarır. Deyəsən, tapıblar da – Vaut Veqhorst. Sən demə, MY-nin niderlandlı hücumçusu yaşıl meydana çıxmaq ərəfəsində “This is Anfield” (Bu “Enfild”di) yazılan lövhəyə toxunmaqla işləri korlayıb. Onun bu jesti “Yunayted” azarkeşləri arasında ciddi narazılıq dalğası doğurub.
Lövhənin mənası nədi? Niyə ona toxunmaq olmaz?
“This is Anfield” lövhəsi “Liverpul”un ev oyunlarını keçirdiyi stadionun rəmzlərindən biridi. “Qırmızılar”ın əksər fanatları ona toxunmağı arzulayır. Bu lövhəni vaxtilə komandanın əfsanəvi baş məşqçisi Bill Şenkli asıb: “Bu lövhə onun üçündü ki, bizə kimin üçün oynadığımızı, rəqiblərə isə kimə qarşı oynadıqlarını xatırlatsın”.
“Liverpul”un futbolçuları uzun illər ərzində meydana çıxarkən məhz bu lövhəyə toxunub. Komandanın indiki çalışdırıcısı Yürgen Klopp isə “This is Anfied” yazısından oyunçulara motivasiya vermək üçün özünəməxsus şəkildə yararlanır. Almaniyalı komanda üzvlərinə deyib ki, titul qazanmayan heç bir futbolçu həmin lövhəyə toxuna bilməz. Və futbolçular 2019-cu ildə Çempionlar Liqasını qazanana qədər onun dediyinə əməl ediblər.
Rəqiblər lövhəyə toxuna bilməz? Yox əşi, kiminsə bu hətta xoşuna gəlib. Məsələn, Veqhorstun tərəfini tutan Yan Rayt da lövhəyə toxunduğunu etiraf edib: “Əlbəttə, mən ona toxunmuşam. Ancaq komanda yoldaşlarımla oynamaq üçün meydana çıxanda yox, isinmə hərəkətləri ərəfəsində. Meydana çıxırsan, lövhəni görürsən və toxunmaya bilmirsən. Bu ki əfsanədi!”
“Liverpul”un və “Everton”un sabiq futbolçusu Don Hatçinson yazır ki, meydana çıxmaq ərəfəsində “This is Anfield”ə toxunan çoxlu qonaq oyunçu görüb. Hərçənd o özü belə etməyib. Yeri gəlmişkən, Karlo Ançelotti 2014-də həmin lövhənin yanında şəkil çəkdirib, Yosip İliçiç isə “This is Anfield”ə toxunmasıyla bağlı tatunu bədəninə döydürüb.
Başqa komandaların formasını geyən, sadəcə, “Liverpul”a azarkeşlik edən oyunçular da lövhəyə toxunub. “Blekbern”dən Robbi Sleyter etiraf edir ki, 1995-ci ildə lövhəyə əlini vurub və buna görə “qırmızılar”ın ulduzu Con Barnsdan danlaq eşidib: “O mənə qışqırdı və dedi ki, sən rəqibin oyunçususan. Mən də cavabında dedim ki, “Liverpul”a azarkeşlik edirəm və toxunmağa tam haqqım çatır”.
Veqhorstdan başqa meydana çıxmaq ərəfəsində Van Diyk, Aleksander-Arnold və Elliott da lövhəyə toxunub (son iki şəxs lap uşaqlıqdan “Liverpul” azarkeşidi). Hələ Kodi Qakpo da toxunub. Yəqin Kloppun bu faktdan xəbəri yoxdu. Axı Qakpo hələ ki klubla heç nə qazanmayıb.
Veqhorst “Liverpul”a sevgisini etiraf edib
Veqhorstla bağlı problem lövhəyə toxunmasıyla məhdudlaşmır. Vaut ötənlərdə dəfələrlə “Liverpul”a sevgisini etiraf edib. İlk etiraf 2018-ci ildə - “Volfsburq”a keçəndən dərhal sonra “De Telegraaf”a verdiyi müsahibədə səslənib: “Uşaqlıqdan “Enfild”də “Liverpul” formasında oynamağı arzulayıram. Düşünürəm ki, tam gücümü ortaya qoysam, əlimə belə imkan düşəcək”.
Bir neçə ildən sonra da mövqeyi dəyişmədi: “Hesab edirəm ki, “Liverpul” xüsusi klubdu. “You’ll Never Walk Alone” mahnısı səslənəndə hələ də tüklərim biz-biz olur. İngiltərənin başqa nəhəng klubları da var, “Milan”ı da həmişə dəstəkləmişəm - əfsanəvi niderlandlı futbolçular orda oynayıb”.
Ancaq “Mançester Yunayted”ə transferdən dərhal sonra Vaut dedi ki, yeni komandası üçün can qoyacaq: “Bu xüsusi məqamdı. Çox qürurluyam və özümü bu komanda üçün fəda edəcəm”.
Azarkeşlər Veqhorstu qovmağı tələb edir
Əlbəttə, həm lövhəyə toxunması, həm də ötənlərdən üzə çıxan açıqlamalar “Yunayted” azarkeşlərini özündən çıxarıb – onlar məğlubiyyətin bütün ağrı-acısını niderlandlı hücumçunun üzərinə töküblər. Sosial şəbəkələrdə futbolçunu asıb-kəsirlər.
“Elə şeylər var ki, “Mançester Yunayted”in futbolçusu bunu etməməlidi. Qoy rədd olub “Bernli”yə, Türkiyəyə və ya gəldiyi başqa yerə dönsün”.
“O, bir daha “Mançester Yunayted”də oynamamalıdı. Hamı bilir ki, “Liverpul” fanatları həmin lövhəyə toxunmağı arzulayır. Bağışlanılmaz səhvdi”.
“MY-nin lövhəyə toxunan ilk futbolçusu. Biz hələ oyun başlalamış uduzmuşduq”.
Roy Kin də narazı azarkeşlərlə həmrəydi:
“Mən heç vaxt o lövhəyə toxunmamışam. Bu heyranlıqdı. Bəli, “Liverpul”un futbolçuları üçün ənənədi, ancaq rəqiblər üçün yox”.
Ancaq Veqhorstun hərəkətinə nisbətən sakit yanaşan “Yunayted” azarkeşləri də var:
“Mənə görə bu, sadəcə, əyləncəli təsadüfdü, yəni Veqhorstun “Liverpul” azarkeşi olduğunu deyib, MY-də görünməsi. Milyonlarla oxşar nümunə tapmaq olar. Məsələn, gənc Cek Qriliş illərlə “Mançester Yunayted” haqda tvit atdı, bu komandaya “Siti” ilə derbidə azarkeşlik etdi. Lövhəyə toxunmaq? Toxundu-toxundu da, dünyanın sonudu? İndi MY oyunçularının istənilən jestinə çoxları şeytani don geydirəcəklər, “emblemə yetərincə sadiq olmamağın” və ya belə axmaq ittihamların əlamətini axtaracaqlar. Guya məhz belə jestlər üzündən uduzublar”.
Veqhorst özünə necə bəraət qazandırır?
“Enfild”dəki darmadağından iki gün sonra niderlandlı hücumçu özü də izahat verməli oldu. Hamını əmin etməyə çalışdı ki, “Liverpul” azarkeşi deyil, həmin lövhəyə isə yalnız Van Diyki qəzəbləndirmək üçün toxunub:
“Adətən, medianın səs-küyünə heç bir reaksiya vermirəm, ancaq bu xüsusi vəziyyətdi. Ona görə ki, “Mançester Yunayted”in möhtəşəm fanatları mənim üçün çox vacibdi. Bu üzdən sosial şəbəkələrdə gəzən videoya aydınlıq gətirmək istəyirəm. Yığmadakı yoldaşlığımızdan bilirəm ki, Vircil hər dəfə oyuna çıxanda lövhəyə toxunur. Və mənim həmin lövhəyə can atmağımın yeganə səbəbi ona belə etməyə imkan verməmək idi. Uşaqlıqdan “Tvente”yə azarkeşlik edirəm, indi isə həm də “Yunayted”ə - oynamağımla qürur duyduğum komandaya. Bu böyük kluba sadiqliyim sorğulana bilməz. Bazar günü hamımız üçün qorxunc idi. Yaxın həftələrdə vəziyyəti düzəltmək üçün maksimum güclə çalışırıq. Birlikdə bu zərbədən özümüzə gələcək və mövsüm üçün bütün hədəflərimizə çatacağıq”.
Videoya əsasən mühakimə yürütsək, Vaut həqiqətən lövhəyə Van Diykdən dərhal sonra toxunur. Yəni “Liverpul”un müdafiəçisi əlini çəkəndən bir saniyə sonra. Veqhorstun belə jestlərlə rəqibləri hövsələdən çıxarmaq həvəsindən isə ən azı Argentina yığmasının futbolçuları yaxşı xəbərdardı. Dünya ulduzu Messi Vautun üzərinə çəmkirməsinə səbəb kimi niderlandlının oyunöncəsi təxribatlarını göstərməmişdimi?
ORXAN
Digər xəbərlər
