Bilindiyi kimi premyer-liqanın son turunda ''Liverpul'' uzun illər xatırlanacaq bir qarşılaşmada ''Mançester Yunayted''i 7:0 hesabı ilə darmadağın etdi.

"Football-plus.az" xəbər verir ki, Mersisaydlıların Roberto Firmino ilə vurduqları 7-ci qoldan sonra qəribə bir olay yaşandı.

Fanatlardan biri meydana çıxaraq qolu komanda ilə birlikdə qeyd etmək istədi. Amma o, son anda sürüşərək yerə yıxıldığı üçün Endryu Robertsonu istəmədən də olsa, zədələdi. Şotlandiyalı müdafiəçi bir müddət acı içində qıvrınsa da, oyunu davam etdirə bildi. Mühafizəçilər daha sonra həmin azarkeşi yaxalayaraq meydandan çıxardılar. Bu epizod baş məşqçi Yürgen Kloppu da yaman əsəbləşdirdi. Almaniyalı mütəxəssis sərt şəkildə həmin fanatın üstünə qışqıraraq ona etirazını bildirdi.

Adı açıqlanmayan həmin azarkeşin 16 yaşlı yeniyetmə olduğu üzə çıxıb. Polislər məsələ ilə bağlı araşdırmaya başlayıblar. Hələlik ''Liverpul'' həmin azarkeşin mövsümlük abunəsinin ləğv olunduğunu açıqlayıb. Amma onun bu hərəkəti bilərəkdən etdiyi, yəni günahkar olduğu sübuta yetirilsə, ''Liverpul'' onun ''Enfild Roud''a girişinə ömürlük qadağa qoya bilər!

Bu qadağa premyer-liqanın digər stadionları üçün də qüvvəyə minə bilər.