Erməni “yox” deyir, “Qalatasaray” əl çəkmir
“Qalatasaray” “Dinamo”nun gənc futbolçusu Arsen Zaxaryandan əl çəkmək istəmir.
19 yaşlı vinger Rusiya yığmasının şərəfini qorusa da, ad-soyadından göründüyü kimi, əslən ermənidi. Bu mövzuda şayiələr hələ ötən həftə yayılmışdı. Amma yavaş-yavaş məsələ şayiə çərçivəsindən çıxaraq ciddiləşməyə başlayır. Srağagün, adətən, verdiyi proqnozlar düz çıxan italiyalı jurnalist Nikola Skira öz “tvitter” səhifəsində İstanbul nəhənginin Zaxaryana görə “Dinamo”ya 13 milyon avroluq rəsmi təklif irəli sürdüyünü iddia etdi! Futbolçunun özünə isə 2027-ci ilə qədər nəzərdə tutulan müqavilə və illik 1,9 milyon avro təklif olunub. Bu xəbərlər ilk dəfə ortaya çıxanda Zaxaryanın məhz erməni olduğuna görə Türkiyədə oynamaq istəmədiyi ortaya atılmışdı. Bu dəfə futbolçu özü də faktiki bunu etiraf etdi: “Şəxsi səbəblər üzündən karyeramı “Qalatasaray”da davam etdirmək niyyətim yoxdu”.
Futbolçunun yaxınları da Türkiyə variantının baş tutmayacağına işarə vurublar. Arsenin qardaşı David “yalnız bir şey deyə bilərəm ki, bu iddialar 100 faiz yalandı” açıqlamasını veribsə, atası Norayr bunları deyib:
“Oğlumun “Qalatasaray”a keçəcəyi ilə bağlı olan bütün məlumatlar yalandı. Arsen özü də fikrini açıqlayaraq Türkiyədə oynamaq istəmədiyini dedi. Səbəb isə odu ki, onu Avropa klublarından birində görmək istəyirik. Onsuz da son dönəmlərdə onunla bağlı çox şayiə yayılır. Bu da onlardan biridi”.
Bu mövsüm 22 rəsmi oyunda 3 qol, 6 məhsuldar ötürməlik performans sərgiləyən Zaxaryanla bir müddət öncə “Çelsi”nin də yaxından maraqlandığı deyilirdi. “Dinamo”nun idarə heyətinin üzvü Sergey Stepaşin də məsələyə münasibət bildirib:
“Zaxaryan gec-tez Avropada oynayacaq. Rəsmi təklif gəlsə, müzakirə edəcəyik. Türkiyə və başqa iddialar, sadəcə, şayiədi. “Çelsi”nin marağı çox ciddi idi. Onlar hesabımıza pul köçürməyə də hazır idilər. Amma Rusiya klublarının hesabları blok olunduğundan keçid baş tutmadı. Türkiyə çempionatı orta səviyyəli turnirdi. Arsen üçün orda oynamaq maraqlı deyil. O özü də ağılsız deyil və bunu gözəl başa düşür. Bir qədər də “artırsa”, Xviça Kvaratsxeliyanın səviyyəsinə çatacaq. Ona görə də bir qədər də burda oynadıqdan sonra birdəfəlik Almaniya və ya İspaniya çempionatına yollanması daha məqsədəuyğundu. Çalışırıq ki, onu fiziki və psixoloji cəhətdən bir qədər də möhkəmləndirək”.
Türkiyə mətbuatının yazdığına inansaq, “Qalatasaray”ın rəsmisi Ərdən Timur gizli şəkildə futbolçunun ailəsi ilə danışıqlar apararaq onları razı salmağa çalışır.
Digər xəbərlər
