''Qalatasaray'' tarixinin ən çox qol buraxdığı mövsümü geridə qoymasına baxmayaraq, komandanın mərkəz müdafiəçilərinə Avropanın önəmli klublarından təkliflər gəlməkdədi.

Məsələn, ''Napoli'', ''Roma'' və ''Atalanta''nın maraq dairəsində olan Markao uğrunda mübarizəyə ''Sevilya'' da qoşulub. Mərkəz müdafiəçisi Dieqo Karlosu 31 milyon avro qarşılığında ''Aston Villa''ya satan ''Sevilya'' Markaoya görə ''Cim-Bom''a 14 milyon avro ilə yanaşı, 10 milyon avro bonus təklif edib. İstanbul nəhənginin bonusa tam yiyələnməsi üçün Markao həm əndəlüslərin matçlarının 80 faizində iştirak etməli, həm də komanda ÇL-ə vəsiqə qazanmalıdı. Hər iki variant yetərincə real görünür. 2019-cu ildə 4 milyon avro qarşılığında ''Çaveş''dən transfer olunan 26 yaşlı braziliyalı geridə qoyduğumuz mövsüm 38 rəsmi oyuna çıxaraq 1 dəfə fərqlənib. Markao həmin qolu AL-də ''Barselona'' ilə görüşdə vurub. Transfer dəyəri təxminən 14 milyon avro civarında olan bu futbolçunun ''sarı-qırmızılar''la 2024-cü ilə qədər müqaviləsi var.

''Qalatasaray''ın digər mərkəz müdafiəçisi Viktor Nelssona isə ''Torino'' ''elçi düşüb''. ''Tuttosport''un xəbərinə görə Qleyson Bremeri 30 milyon avro qarşılığında ''İnter''ə satmağa hazırlaşan Turin təmsilçisi onun yerini məhz danimarkalı ilə doldurmaq niyyətindədi. Klub rəsmiləri ən son Millətlər Liqasında keçirilən Avstriya - Danimarka oyununda Nelssonu stadiondan izləyərək onun oyununu bəyəniblər. ''Torino''nun ''Qalatasaray''a 12-15 milyon avroluq bir təklif irəli sürəcəyi gözlənilir. İtalyanlar həm də Nelssonu gələcəkdə astronomik məbləğə sata biləcəklərinə inanırlar. Amma bu futbolçunun ''Qalatasaray''la müqaviləsində qeyd olunan sərbəst qalmaq şərti 25 milyon avrodu.

Xatırladaq ki, ''Cim-Bom'' 23 yaşlı müdafiəçini ötən yay ''Kopenhagen''dən 7 milyon avroya transfer edib. Nelsson geridə qoyduğumuz mövsümdə 44 rəsmi oyuna çıxıb.